28.03.2024 Скопје
Штипскиот Универзитет одбележува 17 години постоење. Од само два факултети во почетокот, Рударско-геолошкиот и Педагошкиот, Универзитетот денес има 12 факултети и три академии, Ликовна, Музичка и Филмска, а притоа се активни повеќе од 70 студиски програми од прв и втор циклус на студии. УГД е универзитет кој во своето 17-годишно постоење се стреми кон воведување и развој на нови технологии, учество во научноистражувачките текови на светско ниво, креирање иновации, пренос на знаење на студентите и грижа за вработените, истакна ректорот на УГД-Штип, Дејан Мираковски.
Бесплатните студии на катедрата по македонски јазик и книжевност при Филолошкиот факултет на овој релативно млад Универзитет е вложување не само во македонистиката, туку е и гест на алтруизам, рече наградената студентка Сузана Мицева.
И понатаму горчлив проблем останува сместувањето на студентите. Од година во година се зголемува бројката на странските студенти, кои во најголем дел се од Турција, а ваквиот раст само ја нагласува потребата од изградба на голем студентски дом во центарот на источна Македонија. Инаку, Медицинскиот факултет и понатаму останува како најатрактивен за студентите од државата, но и од странство.
Подготвено од М.Д.
About Author
