29.03.2024 Скопје
На саемот за автомобили во Њујорк беа доделени признанијата за Светски автомобил на годината, а на листата на победници доминираа електричните возила. Највисоката чест му припадна на моделот Kia EV9, кој покрај титулата најдобар автомобил во светот за 2024 година, ја доби и наградата за најдобар електричен автомобил на годината.
Кога станува збор за главната награда, конкуренти на EV9 беа кинескиот BYD Seal/Atto 4 и Volvo EX30.
Со должина од 5.010 милиметри, Kia EV9 е најпространото патничко возило на оваа компанија досега и вториот модел на брендот изграден на специјална механичка платформа e-GMP, наменета за електрични модели (Electric Global Modular Platform).
Станува збор за удобен SUV модел кој е достапен во верзија со три реда седишта, односно во опции со 6 или 7 седишта.
Основната верзија на моделот е со ширина од 1.980 mm и висина од 1.755 mm, додека меѓуоскиното растојание е 3.100 mm.
Изведбата GT-line е долга 5.015 mm, додека ширината на возилото е 1.980 mm, а висината е 1.780 mm со идентично меѓуоскино растојание.
Багажникот нуди волумен од 828 литри, ако првите два реда седишта се исправени, или 333 l, ако и третиот ред седишта е исправен.
Kia EV9 има верзии со погон на задните или четири тркала. Двете варијанти доаѓаат со капацитет на батерија од 99,8 kWh.
Верзијата со погон на задните тркала има електричен мотор со 203 КС (149,5 kW) и максимален вртежен момент од 350 Nm. Оваа верзија нуди максимална брзина од 185 km/h и може да забрза од 0 до 100 km/h за 9,4 секунди. Според податоците на WLTP, има домет до 563 километри со едно полнење. Верзијата со погон на четири тркала (AWD) е придвижувана од два електрични мотори со моќност од 384 КС (282,6 kW) секој и максимален вртежен момент од 600 Nm во основната верзија и 700 Nm во верзијата GT-line.
Максималната брзина е 200 km/h. Основната верзија забрзува од 0 до 100 km/h за 6,0 секунди, додека на GT-line верзијата или на надградената основна верзија и се потребни само 5,3 секунди. Верзиите AWD можат да се пофалат со опсег според стандардот WLTP до 512 km (основна линија) или 505 km (GT-Line).
Kia EV9 има ултрабрзо полнење од 800 волти, што значи дека сопствениците можат да поминуваат повеќе време во возење и помалку време на полнење. По 15 минути полнење, досегот е до 249 km (RWD) или до 226 km со верзијата AWD.
Корејците триумфираа во друга категорија. Електричниот Hyundai Ioniq 5 N е прогласен за спортски автомобил на годината, оставајќи го зад себе дуото M2 и XM на BMW.
Ioniq 5 N има систем за погон на четири тркала со два електрични мотори кои заедно произведуваат до 650 КС (478 kW). Ова му овозможува на возилото да достигне 100 km/h за само 3,4 секунди, пред да достигне електронски ограничена максимална брзина од 260 km/h.
Volvo EX30 доби утешна награда. Прогласен е за најдобар урбан автомобил во светот, пред BYD Dolphin и Lexus LBX.
BMW Series 5/i5 зад себе остави два Mercedes, E-Class и електричниот SUV EQE и ја освои наградата за луксузен автомобил на годината во светот.
Toyota Prius ја освои титулата за најдобар дизајн, пред Ford Bronco и Ferrari Purosangue.
Renault Scenic претходно беше прогласен за најдобар автомобил за 2024 година во Европа.
Подготвено од А.Ѓ.
About Author
