26.03.2024 Скопје
Високиот суд на Шпанија ја суспендираше претходната одлука за блокирање на социјалната мрежа Телеграм, наведувајќи дека ќе чека полициски извештај за влијанието на можната забрана за користење на оваа платформа во Шпанија.
Неколку медиумски компании во Шпанија, како Atresmedia, Mediaset, EGEDA и Telefonica, поднесоа тужба против Телеграм, тврдејќи дека апликацијата им овозможува на клиентите да ги користат нивните медиумски содржини без дозвола.
Судијата Сантијаго Педрас претходно се согласи да го блокира Телеграм до истрага во петокот, но сега ја смени својата одлука.
Според истражувањето на шпанскиот регулатор, Телеграм е четвртата најпопуларна апликација за пораки во Шпанија, која ја користат речиси 19 отсто од анкетираните граѓани.
Основачот и сопственик на таа платформа, Павел Дуров, претходно во интервју за Financial Times (FT) изјави дека Телеграм има 900 милиони месечни активни корисници и се приближува до профитабилноста.
Тој додаде дека Телеграм, кој имаше 500 милиони корисници на почетокот на 2021 година, заработи „стотици милиони долари“ откако пред две години воведе реклами и премиум претплати.
Подготвено од А.Ѓ.
About Author
