19.03.2024 Скопје
„2.252 лица примале минимална гарантирана помош и социјална пензија иако таа не им следувала“ обвинува техничкиот министер за труд и социјална политика Ѓоко Велковски.
Тој појасни дека еден од условите за добивање на таа помош е да не се поседува возило, но дел од граѓаните иако имале возило аплицирале и добиле помош. На документите навеле дека немаат возило, но инспекциските служби сега го утврдиле спротивното.
Велковски смета дека во ова се вклучени повеќе сторители и се надева дека набрзо ќе бидат откриени бидејќи со овие незаконски исплати државниот буџет е оштетен за повеќе од 18 милиони денари месечно.
Од кабинетот на дополнителната заменичка министерка Јована Тренчевска ги демантираат сите обвинувања на Велковски. Велат дека до денес сите случаи каде што е утврдено дека корисникот дал лажни инфрмации за поседување на имот, правото на социјална заштита се укинува и корисникот ги враќа парите.
Право на гарантирана минимална помош и на социјална пензија може да добијат материјално необезбедени домаќинства кои немаат во сопственост имот и имотни права од кои можат да се издржуваат.
Подготвено од М.Д.
About Author
