16.03.2024 Скопје
Цените на нафтата се во благ пад, но се на пат да забележат раст од над три отсто на неделно ниво под влијание на предвидениот пораст на побарувачката во текот на 2024 година и неочекуваното намалување на залихите во САД.
Барел нафта брент на лондонскиот пазар поевтини за 47 центи и сега чини 84,95 долари, додека барел сурова нафта во САД се продава за 80,77 долари.
Цените останаа во опсегот од поголемиот дел од минатиот месец, приближно помеѓу 80 и 84 долари за барел.
Меѓународната агенција за енергија (ИЕА) прогнозираше поголема побарувачка во 2024 година, бидејќи бунтовничката група Хути поврзана со Иран во Јемен продолжува да го прекинува снабдувањето преку Црвеното Море.
Глобалната побарувачка на нафта се очекува да се зголеми за 1,3 милиони барели дневно оваа година, проценува ИЕА во својот најнов извештај.
За растот на цените придонесуваат и нападите на Украина врз руските нафтени рафинерии. Во еден од најсериозните напади врз рускиот енергетски сектор во последните месеци, избувна пожар во најголемата рафинерија на Роснефт.
Залихите на сурова нафта во САД, исто така, неочекувано паднаа минатата недела, бидејќи рафинериите ја зајакнаа обработката, додека залихите на бензин беа намалени поради зголемената побарувачка, соопшти американската Управа за енергетски информации.
Подготвено од А.Ѓ.
About Author
