06.03.2024 Скопје
Новата хемиска анализа открива траги од никотин на остатоците од пред шпанските керамички вазни пронајдени во Гватемала. Археолозите открија грнчарска колекција на археолошкиот локалитет Коцумалхуапа, кој служел како еден од „најголемите градови“ во Мезоамерика за време на доцниот класичен период (650-950 година од н.е.).
Иако раните колонијални записи и минатите студии потврдија дека употребата на тутун се случила во Мезоамерика, до сега има малку физички докази за оваа практика, се вели во соопштението.
„Знаевме дека тутунот е многу важна стока што се користи за различни ритуални и терапевтски цели во античка Мезоамерика и низ Новиот свет“, рече коавторот на студијата Освалдо Чинчила Мазариегос, асистент професор по антропологија и директор за додипломски сттудии по археологија на Универзитетот Јеил.
„Сепак, археолошките докази се ретки бидејќи остатоците од тутун ретко се добро сочувани“, додаде тој.
За студијата, археолозите анализирале вазни пронајдени во близина на акрополата Ел Баул во Коцумалхуапа во 2006 и 2007 година. Тие хемиски тестирале примероци излупени од внатрешноста на седум вазни, а три биле позитивни на траги од тутун. Истражувачите беа изненадени од резултатите, бидејќи високиот, тесен облик на садовите беше сличен на оние што вообичаено се користат за задржување течности. Ова би можело да значи дека наместо „да се пуши како сув лист или да се шмрка во прав“, тутунот „можел да се конзумира и како течна инфузија“, се вели во соопштението.
Исто така, можно е луѓето од неименувана култура да ја конзумирале течната инфузија додека истовремено пушеле или шмркале тутун, заклучија истражувачите. Внесувањето високи концентрации на никотин може да биде токсично, па дури и смртоносно, така што мешавината на пијалоци сугерира дека тутунот се користел за време на ритуалот како „наркотик за да предизвика длабок сон, визии и пророчки транс“, напишаа истражувачите во студијата. Постојат претходни докази дека Ацтеките и домородците на островите на Карибите, исто така, учествувале во никотинските ритуали.
„Очекувавме дека анализата на остатоците во овие добро сочувани садови ќе открие детали за употребата на растенијата во ритуалните активности“, рече Чинчила Мазариегос, според соопштението. Керамичките садови беа пронајдени во близина на остатоците од бањите со пот во Коцумалхуапа, што е дополнителен доказ дека инфузиите од тутун можеби се користеле во ритуалите за чистење, забележаа авторите на студијата.
Откритието нуди и јасни докази дека употребата на тутун во Америка започнала порано отколку што мислеле експертите. Сепак, ова не е најраниот познат пример за употреба на тутун. Студијата од 2021 година заснована на изгорени семиња пронајдени во пустината Јута покажа дека луѓето пушеле тутун пред најмалку 12.000 години.
Подготвено од А.Ѓ.
About Author
