05.02.2024 Скопје
Од ова место можеме сите ние заедно да си признаеме дека за жал генерациите кои го наследија македонскиот великан Гоце Делчев можеби не успеаја во тоа што тој го остави како свој аманет. За жал многумина во минатото неговите зборови поинаку ги протолкуваа, или не ги разбраа доволно и затоа денеска Македонија и македонскиот народ како еден од најмалкубројните народи во Европа, се наоѓаат пред предизвикот на опстојување, изјави претседателот на ВМРО-ДПМНЕ на средба со македонската заедница во Тринген, Швајцарија. Потпретседателот на ВМРО-ДПМНЕ Александар Николоски при денешната посета на нашинците таму рече дека Македонецот е национално погазен, економијата тоне, а корупцијата цвета. Во делегацијата е и пратеникот Драган Ковачи кој истакна дека власта се базира на антимакедонштина и во основа нема грижа за македонските национални интереси.
Мицкоски истакна дека после 8 мај и новата влада на ВМРО-ДПМНЕ сѐ ќе биде поинаку, а прва задача ќе биде повеќе деца да се крштеваат во Македонија отколку во странство, односно да се вратат луѓето дома.
„Ние како политичари да сториме сѐ што е во наша моќ да овозможиме услови нашата дијаспора да се врати дома, да живее, инвестира и биде задоволна. Сакам следната ваква средба да ја направиме со историски најголемата победа на 8 мај дома во Македонија“, рече Мицкоски.
Мицкоски додаде дека изминатиов период ВМРО-ДПМНЕ била исправена пред бројни предизвици, но, издржала, успеала и денес се наоѓа пред историска победа.
„Успеавме, издржавме и денеска можеме да бидеме горди дека после историската борба на локалните избори во 2021 година кога за прв пат политичка партија од позиција на опозиција освои мнозинство, сега сме пред историска победа на парламентарните и претседателските избори како никогаш досега. Таа победа мора да биде со консолидиран број 61 пратеници, затоа што победата нема да биде доволна само за обични реформи, нас ни треба целосна трансформација на Македонија. Оваа генерација политичари на ВМРО-ДПМНЕ која ќе има можност да ја води Македонија и да работи само за интересот на Македонија, македонскиот народ и граѓаните на Македонија“, рече Мицкоски.
Мицкоски нагласи дека сојузник на ВМРО-ДПМНЕ му е народот и без народот нема ВМРО-ДПМНЕ, а без ВМРО-ДПМНЕ ја нема Македонија.
„Мотивирани сме, знаеме како, сме поминале голем дел од нашето образование и надвор од Македонија, сме поминале многу предизвици заедно како тим, како луѓе, раководство, генерација. Јас сум презадоволен што можам да кажам дека една плејада млади луѓе кои денеска ја имаат можноста да управуваат со општините, општинските комитети на ВМРО-ДПМНЕ, јавните претпријатија, повеќе од 2 години тоа го прават достоинствено, чесно и посветено и покрај сите опструкции со кои се соочуваат. Повеќе од 2 години во Македонија немате ниту еден скандал поврзан со градоначалниците и официјалните лица на локално ниво од страна на ВМРО-ДПМНЕ“, рече Мицкоски.
Мицкоски нагласи дека од друга страна Владата на СДСМ и ДУИ на дневна основа генерираат по 2-3 скандали.
„Покажавме дека не сме сите исти, дека и со минимални ресурси можеме да постигнеме многу. Од загубари општини, блокирани општини, денеска со гордост можеме да кажеме дека после 2 години, само половина мандат и тоа во услови на Влада на ДУИ и СДСМ голем дел од нив успеаја да го вратат долгот на нивните претходници од редот на СДСМ и да ги одблокираат општините кои со децении биле блокирани“, рече Мицкоски.
Тој додаде дека за помалку од 2 месеци почнува кампањата, за помалку од 3 месеци ќе биде денот кога македонскиот народ и граѓаните на Македонија силно треба да зборуваат и оваа Влада на СДС и ДУИ да замине и никогаш да не се повтори.
„Ви ветувам дека за тоа што го направија во изминативе 6 и пол години детално ќе се посветам во анализа и одговорност за сторителите ќе има. Да не дозволиме да ја губиме Македонија. Сите заедно да се обединиме и на 8 мај а претходно тука на 24 април да дадеме една голема поддршка на кандидатот за претседател кој ќе го поддржи ВМРО-ДПМНЕ и коалицијата која ќе ја предводи ВМРО-ДПМНЕ“, изјави Мицкоски.
Потпретседателот на ВМРО-ДПМНЕ Александар Николоски при денешната посета на нашинците таму рече дека Македонецот е национално погазен, економијата тоне, а корупцијата цвета.
„Ако треба во една реченица да се опише што се случува во Македонија, тоа е дека Македонецот е национално погазен, економијата тоне, а корупцијата цвета“, истакна потпретседателот на ВМРО-ДПМНЕ Александар Николоски при денешната посета во Тринген Швајцарија.
Тој додаде дека изминативе 6-7 години покажале дека не треба многу време за нешто да се уништи.
„СДС и ДУИ овие 6-7 години покажаа дека не треба многу време за да се уништи нешто што генерации го создавале, доколку нема јасно национално единство и доколку нема политичка структура која има јасно национално чувство“, кажа Николоски.
Во делегацијата е и пратеникот Драган Ковачи кој истакна дека власта се базира на антимакедонштина и во основа нема грижа за македонските национални интереси.
„Тие имаат еден заеднички интерес, а тоа е интересот кој повеќе ќе украде, кој повеќе ќе ја разграба Македонија. И двете структури се базираат на антимакедонштина и во основа немаат грижа за македонските национални интереси. Нив не ги интересира како ќе се развива Македонија, дали ќе биде Македонија на еднакви граѓани, без разлика на вера, националност или ќе биде поделена и разграбана Македонија. Нив тоа не ги интересира и вие сте најдобар доказ за тоа, затоа што најголемиот дел од вас се иселеници затоа што во Македонија нема ред и поредок“, рече Ковачки.
Ковачки посочи дека Македонците во Македонија, треба да престанат да се чувствуваат како граѓани од втор ред, додавајќи дека актуелната власт „освен што го деградираше македонскиот граѓанин и ги распродаде националните интереси, не вложува и не гради ништо, ни автопати, ни болници, ниту училишта иако годишно троши по пет милијарди евра државен буџет“.
„Би сакал да упатам апел до сите вас да дојдете во Македонија и да покажеме дека ние како Македонци, како дијаспора сме добро организирани и да се обединиме за македонската национална кауза. Ова е последен момент, тоа е последната генерација на македонски политичари кои што можат да ја спасат Македонија, затоа што ако останат овие истите на власт, сметајте дека ние држава нема да имаме“, посочи Ковачки.
Подготвеноод М.Д.
About Author
