07.02.2024 Скопје
Управниот суд во Келн пресуди дека домашната разузнавачка агенција на Германија може да го класифицира младинското крило на екстремно десничарската партија Алтернатива за Германија (AfD) како екстремистичка, што ја поттикна дебатата за тоа дали групата треба да биде забранета.
Судот во итна постапка утврди дека младинската група, позната како Млада алтернатива, „продолжила да учествува во масовна агитација против странците“ и особено „антиисламска и антимуслиманска агитација“.
Германската домашна разузнавачка агенција, која има задача да ги следи групите кои се сметаат за неуставни, ја класифицираше Младата алтернатива како екстремистичка во 2023 година, откако ја следеше со години.
АфД и Младата алтернатива се обидоа да се спротивстават на овој потег на суд.
Судот во Келн, сепак, пресуди дека класифицирањето на Младата алтернатива како екстремистичка е оправдано, иако групата најверојатно ќе поднесе жалба на одлуката.
Судската одлука сигурно ќе поттикне дебата во Германија за тоа дали Младата алтернатива треба да биде забранета.
Стотици илјади Германци излегоа на улиците во последниве недели за да демонстрираат против АфД и екстремно десничарскиот екстремизам.
„Одлуката на судот во Келн јасно покажува дека имаме работа со огромен презир кон луѓето, расизам, омраза кон муслиманите и напади врз нашата демократија“, изјави германската министерка за внатрешни работи и членка на владејачките социјалдемократи, Ненси Фезер.
Фезер нагласи дека Германија ќе продолжи да презема мерки против десничарскиот екстремизам.
Подготвено од А.Ѓ.
About Author
