02.02.2024 Скопје
Јужна Калифорнија беше погодена од невреме придружено со обилни дождови, што предизвика помали поплави и затворање на патиштата, а повеќе невреме се очекува во текот на викендот.
Градот Лонг Бич, јужно од Лос Анџелес, беше еден од најтешко погодените од поплавите, а дел од автопатот и улиците под железничкиот мост беа поплавени.
Најмалку еден возач морале да го извлечат пожарникарите од поплавениот автомобил.
Поплавите и одроните на камења затворија многу други патишта низ регионот, вклучувајќи го и сообраќајниот тунел што го поврзува автопатот Пацифик Коуст со автопатот Санта Моника.
Во четвртокот имаше најмалку 50 сообраќајни несреќи во центарот на Лос Анџелес, а пожарникарите мораа да спасат еден маж кој остана заробен во поплавен автомобил.
Издадено е предупредување за поплави во округот Лос Анџелес, округот Оринџ и Сан Диего.
Невремето најпрво во средата ја погоди американската сојузна држава Орегон и северна Калифорнија, а потоа се прошири на југ, погодувајќи ја областа на заливот Сан Франциско.
Силен снег падна на повисоките места во планинскиот венец Сиера Невада во Калифорнија.
Подготвено од А.Ѓ.
About Author
