13.02.2024 Скопје
На полноќ истече рокот од одредбата од Договорот од Преспа за валидноста на исправите и документите за меѓународна употреба, но Собранието со итни законски измени овозможи возачките со „Република Македонија“ ќе може да се заменат до крајот на годинава.
Со 90 гласа „за“, ниту еден против и воздржан, во рамки на 144. седница, Собранието по скратена постапка го донесе Законот за измени на Законот за безбедност на сообраќајот на патиштата според кој возачките дозволи со „Република Македонија“ ќе важат до крајот на годината.
Законските измени се на предлог на пратениците Никола Мицевски, Мартин Костовски, Вјолца Адеми, Аднан Незири, Димитар Апасиев и Павле Трајанов.
Како што истакна истакна координаторот на ВМРО-ДПМНЕ, Мицевски, образложувајќи ги предложените измени, преку меѓусебен консензус, сите координатори на партиите дошле до заедничко решение, на оваа седница да предложат измени на Законот за безбедност на сообраќајот на патиштата, по скратена постапка.
Претседателот Стево Пендаровски, веднаш потоа го потпиша указот за измените на Законот за безбедност на сообраќајот на патиштата со кои се пролонгира важењето на возачките дозволи со старото уставно име. Пендаровски, како што соопшти неговиот Кабинет, ја поздравува одлуката на пратениците кои денеска ги ставија интересите на граѓаните над дневната политика и донесоа решение за возачките дозволи.
Според министерот за внатрешни работи Панче Тошковски, со новото име се издадени некаде околу 525.000 возачки дозволи, додека со старото име во важност се 272.000 возачки дозволи. Тоа се важечки возачки дозволи кои не се обновени со новото име и сега со законските измени за безбедност во сообраќајот тие ќе важат до 31.12.2024 година.
Во моментов, според Тошковски, има околу 30.000 македонски и околу 60.000 албански обрасци за возачки дозволи. До март се очекува да пристигнат уште 160.000.
Договорот од Преспа стапи во сила на 12 февруари 2019 година со што важноста на пасошите со старото име истекува пет години подоцна, односно на 12 февруари годинава.
Договорот од Преспа беше потпишан на 17 јуни 2018 година, а уставните измени за промена на името во Северна Македонија во Собранието беа изгласани на 11 јануари 2019 година. По излегувањето на измените во Службен весник во февруари 2019 година почнаа да течат петгодишните рокови согласно Договорот.
Подготвено од М.Д.
About Author
