23.01.2024 Скопје
Лидерот на германската екстремно десничарска партија Алтернатива за Дојчланд, Алиса Вајдел изјави дека ќе излезе на референдум за напуштање на Европската унија доколку оваа партија дојде на власт.
Вајдел го поздрави излегувањето на Обединетото Кралство од ЕУ како сосема коректен потег.
„Тоа е модел за Германија, опција за да може да се донесе таква суверена одлука“, рече Вајдел.
Вајдел ја води партијата од 2022 година и вели дека владата на АфД ќе се обиде да ја реформира ЕУ и да го отстрани нејзиниот „демократски дефицит“, вклучително и ограничување на овластувањата на Европската комисија, „неизбрана извршна власт“.
„Но, ако реформите не се можни, ако не успееме да го обновиме суверенитетот на земјите-членки на ЕУ, треба да ги оставиме луѓето да одлучуваат, исто како што направи Велика Британија. И би можеле да имаме референдум за Дексит – излегување на Германија од ЕУ“, кажа Вајдел.
Сепак, смета дека АфД нема да дојде на власт во Германија пред 2029 година. Но, таа инсистираше на тоа дека идната улога на АфД во владата е неизбежна. Да потсетиме, таканаречениот „заштитен ѕид“ спречува каква било форма на коалицирање или соработка меѓу АфД и другите партии.
Како резултат на тоа, и покрај својата сила во анкетите, АфД нема водечка улога во ниту една од 16-те германски покраини влади. Вајдел предвиде дека централно-десничарските Демохристијани (ЦДУ) ќе бидат првите што ќе се откажат од бојкотот.
Јасно е дека работата не е алармантна, но кога вакво нешто ќе каже лидер на партија која бележи голем подем, сигурно е дека се работи за сериозна работа. Германија е срцето на Европската унија, невозможно е да се замисли ЕУ без Германија. Претпоставувам дека токму тоа е причината зошто германските мејнстрим партии се посветени проевропски и едноставно не се расправаат за потребата да останат во заедницата на европските народи.
И Германците, кои се признати како еврофили, исто така силно ја поддржуваат идејата за Европската унија, според анкетата спроведена од фондацијата Конрад Аденауер, тинк-тенк поврзан со главната опозициска партија на централно-десничарската ЦДУ.
Во анкетата спроведена помеѓу јуни и септември, 87 отсто од испитаниците рекле дека го поддржуваат продолжувањето на членството на Германија, додека 10 отсто се изјасниле дека се против. Гласачите и симпатизерите на АфД се поделени на оваа тема.
52 отсто од нив се изјасниле дека се за членство на Германија во Европската унија, додека 42 отсто од нив се за излегување на Германија од ЕУ. Иако мнозинството се уште е за останување во Европската унија, загрижува бројот на оние кои се против. Таа бројка, што се однесува до останатите партии, не е поголема од десет проценти.
Во меѓувреме, се случи сегашното германско раководство, ако ги гледаме последните 20 години, да биде најмалку активно во ЕУ, најмалку лидерски настроено.
Италија има премиерка која е критикувана за нејзините врски со неофашизмот, а шпанскиот премиер ја зачува власта преку невообичаени манипулации на работ на уставноста.
Основана во 2013 година, AfD започна како партија против еврото среде еврокризата, пред да стане цврста антиимигрантска партија во средината на бегалската криза во 2015 година. Политичката партија се придржува кон фрустрациите предизвикани од пандемијата на корона вирусот и редовно поттикнува страв и шири теории на заговор. Нејзините лидери редовно се појавуваат во медиумите користејќи нацистички јазик, спомнувајќи антисемитски термини, негирање на холокаустот и тривијализирање на нацистичкото минато на Германија.
Минатиот викенд илјадници луѓе протестираа низ Германија против АфД и нејзината радикална идеологија. Демонстрации од ретко видени размери се одржуваат веќе една недела.
Една од причините е откритието на медиумската компанија Correctiv, објавено на 10 јануари, за состанокот на екстремистите одржан во Потсдам. Тогаш се дозна дека екстремистите подготвуваат план за масовно протерување на имигранти и странци во ноември.
Демонстрантите држеа натписи на кои пишуваше „Фашизмот не е алтернатива“ и „Нема место за нацистите“. Претставниците на синдикатите, здруженијата, Зелените и Социјалдемократската партија (СПД) на канцеларот Олаф Шолц посебно ги поканија луѓето да учествуваат на протестите. На протестите учествуваа и членови на ЦДУ.
Германскиот естаблишмент на тој начин се обедини против АфД, која, и покрај протестите, се зголемува на гласачките места во трите поранешни источногермански покраини кои одржуваат регионални избори подоцна оваа година. Токму на истокот на земјата АфД е веројатно најсилната партија, со поддршка од над 30 отсто од гласачите. Не само дел од населението и другите политички партии се против АфД, туку и во Бундестагот се зборуваше за нејзина забрана.
Лидерите на СПД, но и на опозициската ЦДУ се заложија за покренување на постапката за утврдување на можноста за забрана. Германската министерка за внатрешни работи Ненси Фезер не го исклучи покренувањето на постапката за забрана, но истовремено нагласи дека „пречките на патот до забраната се многу високи“.
Во средината на декември, германското разузнавање презеде драматични чекори за класификација на огранокот на AfD во Саксонија како закана за демократијата – потенцијален прв чекор кон целосна забрана на партијата како неуставна.
И покрај сето ова, во актуелните анкети на јавното мислење со месеци, со вредности меѓу 22 и 25 отсто поддршка, АфД се етаблира на второто место по партиска популарност.
Подготвено од А.Ѓ.
About Author
