04.01.2023 Скопје
Делови од северозападна Европа се борат со последиците од невремето од Атлантикот кое донесе дожд и снег, додека северот на Скандинавија е екстремно студен.
Фериботот со околу 900 патници на релација Норвешка-Данска поради невремето не можеше да се закотви во Копенхаген и чека да се подобри времето, иако тоа не се очекува пред денес.
Во Норвешка, во јужниот град Кристијансанд, училиштата беа затворени, а јавниот превоз во прекин по обилните снежни врнежи.
Истата бура донесе урагански ветрови во делови од Англија и Велс, предизвикувајќи прекин на електричната енергија, прекин на железницата и затворање на патиштата поради поплави.
Една 59-годишна жена загина во Источна Фландрија, Белгија, откако ја удри ограда што ја сруши ветрот, изјави локалната гувернерка Карина Ван Каутер.
Во шведското село Квиќок на Арктикот е забележана температура од минус 43,6 степени Целзиусови, а ова е најстудениот јануари во Шведска во последните 25 години.
Во Лапонија на северот на Финска, една жена исчезнала во невреме додека била на скијање, а подоцна била пронајдена мртва под лавина. Финската полиција соопшти дека потрагата по нејзиното дете продолжува и денеска.
Подготвено од А.Ѓ.
About Author
