МАКСИМ ДИМИТРИЕВСКИ: ДРЖАВАТА ТРЕБАШЕ ДА ГИ СНОСИ ТРОШОЦИТЕ ЗА ЛИЧНИТЕ ДОКУМЕНТИ

12.01.2024 Скопје

Целиот товар за обнова на личните документи со новото име согласно договорот од Преспа требаше да го сноси државата, а не граѓаните, кажа претседателот на партијата „Движење за наша Македонија“, Максим Димитриевски.

„Срамно е да ги гледаме вака граѓаните каде стојат и се туркаат за да добијат личен документ, а уште поголем срам е нефункционалноста на Министерството за внатрешни работи да ја спроведе целата постапка. Истата не е изнудена од вчера, таа беше планирана подолг временски период. Треба да им се каже на граѓаните да, имате рок толку време, дополнително се пролонгира рокот и сето тоа ќе биде бесплатно бидејќи вие не сте виновни за тоа што морате да ги промените сопствените документи“, рече Димитриевски.

Тој меѓу другото посочи дека договорот не се почитува од грчка страна, и дека тие немаат ништо спроведено и имплементирано во обврските потпишани во договорот.

„Договорот има две страни и двете страни имаат обврски. Од другата страна немаат мрднато ни милиметар. Оваа година сите ја посетивме Грција и сè уште не постои табла ниту со Северна Македонија, туку пишува едно знакче Скопје. И таму централната власт ја префрла топката на регионалната или локална власт во делот на Солун, а локалната власт пак ја префрла топката на централната власт. И затоа според мене овој договор можеби можел да се уреди со дополнителни договори и анекси да се допрецизираат некои работи“, додава тој, потенцирајќи дека актуелната власт ќе си замине, по што ќе дојдат нови посериозни луѓе кои ќе ја завршат работата и тоа на сметка на државата. 

На прашањето дали може да се случи граѓаните да не можат да го остварат своето гласачко право доколку не ги промениле своите лични документи, Димитриевски вели дека не знае за сигурно, но секако не ја исклучува можноста за изборни злоупотреби како што било пример во сите изборни циклуси до сега.

„Имало злоупотреби за време на сите изборни циклуси и јас тоа го почувствував на локалните избори во Куманово многу директно и брутално со инволвирање на голем дел од државниот апарат во изборниот процес, вклучувајќи и злоупотреба на многу поединци кои беа вработени претходно во МВР и други државни институции. Сепак, не верувам дека некој би се дрзнал да оди до толку далеку и да програмира или планира такви активности бидејќи сметам дека народот во тој момент ќе биде крајно разочаран и ќе се почувствува изневерен, злоупотребен и ќе реагира на такво нешто“, порачува Димитриевски.