12.01.2024 Скопје
Американската конгресменка Клаудија Тени, претседателка на српската пратеничка група, изјави дека одлуката на Стејт департментот да испорача ракети Javelin на Приштина е погрешна, опасна и неверојатно запалива и дека ја зголемува веројатноста за нов конфликт.
Одлуката на Стејт департментот да испрати ракети Javelin во Приштина е неверојатно запалива, особено додека тензиите се зголемени на Западен Балкан, напиша Тени во соопштението објавено на платформата Икс (Твитер).
„Оваа одлука само долева масло на огнот и ја зголемува веројатноста за нов конфликт“, рече таа.
Згора на тоа, како што наведе таа, оваа одлука ја наградува Приштина додека таа продолжува да ги игнорира претходните меѓународни обврски, како што се договорените во Бриселскиот договор од 2013 година.
„Затоа воведов закон кој ќе го поддржи Бриселскиот договор од 2013 година за да ја смета Приштина одговорна за непочитување на меѓународните договори“, напиша таа.
Тени изјави дека САД не треба да продолжат да го вооружуваат и финансираат режимот на Курти, кој очигледно не ги почитува меѓународните норми.
„Знаеме дека испраќањето дополнително оружје во Приштина нема да доведе до мир. Наместо тоа, Белград и Приштина постигнаа напредок преку дипломатијата во постигнувањето стабилен, безбеден и просперитетен регион на Западен Балкан“, додаде таа.
Таа посочи дека затоа ќе иницира заедничка резолуција со која не се одобрува испораката на оружје според Законот за контрола на извозот кога Конгресот ќе биде официјално известен за оваа продажба.
„Го повикувам Конгресот брзо да ја усвои оваа резолуција и исто така да го повика претседателот да го промени курсот“, рече Тени.
Потсетуваме, српскиот претседател Александар Вучиќ претходно денеска изјави дека Србија ќе продолжи да се однесува одговорно и да придонесува за стабилноста на Балканот, како и дека ќе работи на зачувување на српско-американските односи и покрај тоа што САД одлучија да го прифатат барањето на Приштина за набавка на противтенковски ракети.
Вучиќ го прими американскиот амбасадор Кристофер Хил, кој го информираше за американската одлука, за која претседателот рече дека е „големо разочарување“ за Србија.
Министерот за одбрана на приштинските власти Ејуп Македончи потврди дека се започнати процедурите за набавка на противтенковски ракети „Javelin“ од САД и посочи дека одлуката за оваа набавка е дел од планот за транзиција на таканаречените косовски безбедносни сили во војска.
Подготвено од А.Ѓ.
About Author
