13.01.2024 Скопје
Франција и Шпанија и се придружија на Италија во одлуката да не учествуваат во американските и британските напади врз Хутите во Јемен и не ја потпишаа ниту изјавата на 10 земји што го оправдуваат нападот.
Американски и британски воени авиони, бродови и подморници извршија десетици воздушни напади низ Јемен во текот на ноќта како одмазда за повторените напади на Хутите на една од најпрометните бродски рути во светот.
Холандија, Австралија, Канада и Бахреин обезбедија логистичка и разузнавачка поддршка за операцијата, соопштија американските власти.
Германија, Данска, Нов Зеланд и Јужна Кореја потпишаа заедничка изјава со шесте земји во која ги оправдуваат нападите во текот на ноќта и предупредуваат дека ќе бидат спроведени нови мерки за заштита на слободниот проток на трговија на Црвеното Море доколку Хутите не отстапат.
Француски функционер, кој сакаше да остане анонимен, рече дека Париз стравува дека ако се приклучи на нападите предводени од САД, ќе ја изгуби моќта што ја има во преговорите за смирување на тензиите меѓу Хезболах и Израел.
Сигнализирајќи можна премолчена поддршка за акцијата на САД, француското Министерство за надворешни работи објави соопштение во кое вели дека Хутите се одговорни за ескалацијата.
Шпанската министерка за одбрана Маргарита Роблес изјави дека Мадрид не презел воена акција во Црвеното Море бидејќи сака да промовира мир во регионот.
„Секоја земја мора да даде објаснувања за своите постапки. Шпанија секогаш ќе биде посветена на мирот и дијалогот“, рече таа за новинарите во Мадрид.
Извор од кабинетот на италијанската премиерка Џорџија Мелони изјави дека Италија одбила да го потпише коминикето и затоа не била побарана да учествува во нападот врз Хутите.
Извор од владата рече дека Италија била побарана да учествува, но таа одбила од две причини, прво затоа што учеството на Италија ќе бара одобрување од парламентот, за што ќе биде потребно време, и второ затоа што Рим претпочита да води „мирна“ политика во Црвеното Море.
Подготвено од А.Ѓ.
About Author
