21.12.2023 Скопје
Украинскиот претседател Володимир Зеленски е убеден дека европската финансиска инјекција од 50 милијарди евра, на која стави вето унгарскиот лидер Виктор Орбан, ќе пристигне наскоро, заедно со поголема поддршка од другите сојузници.
„Работиме на тоа“, рече украинскиот лидер во вторникот во Киев на неговата годишна прес-конференција. Зеленски, исто така, ја окарактеризира одлуката на Европската унија за отворање на пристапните преговори како „голема победа“ за Украина, откако Унгарија се откажа од своето противење.
Тој, сепак, призна дека неговиот однос со унгарскиот премиер, со кој неодамна се сретна во Буенос Аирес на инаугурацијата на аргентинскиот претседател Хавиер Мајли, е сложен.
„Во Аргентина го прашав Орбан зошто не поддржува да влеземе во ЕУ. Тој не знаеше како да ми каже“, рече украинскиот лидер.
„Можеби неговата политика не е многу пријателска кон Украина, иако сме соседи и имаме заеднички предизвици“, истакна тој.
Отворањето на пристапните преговори со ЕУ го зајакна моралот во Киев, особено затоа што се соочува со уште една зима на целосни руски специјални воени операции. Но, таа земја се соочува и со тешка економска ситуација додека се уште брои и чека повеќе од 100 милијарди евра финансиска поддршка од Вашингтон и Брисел. На Украина и е потребна оваа помош за да го преживее конфликтот, на кој не му се гледа крајот.
„Никој не знае кога ќе заврши“, призна Зеленски во вторникот.
Украина и претседателот минуваат низ некои од најтешките времиња од почетокот на конфликтот. Русија ја зајакна одбраната и ја зацврсти својата позиција на фронтот на окупираните територии на исток и југоисток, а во исто време влезе во фаза на воена економија и го зголеми производството на оружје. Во меѓувреме, Украина бележи само мал напредок во контраофанзивата во која и Украинците и сојузничките земји имаа големи надежи.
Некои аналитичари дури почнуваат да се прашуваат дали Киев почна да ја губи војната. Зеленски, облечен во својата сега традиционална воена униформа во телевизиски настап, категорично го негираше ова.
„Што се однесува до бојното поле, Русија не постигна ниту една од своите цели за оваа година“, рече тој. @А сепак, тој не ја смени пораката на своите цели“. Рускиот претседател Владимир Путин минатата недела изјави дека целта на Русија останува демилитаризација на Украина.
Со оглед на ограничениот напредок на контраофанзивата, Зеленски избегна да зборува за нови цели, доколку ги има. „Пред неколку месеци сите зборуваа за цели и разговараа за спецификите за тоа како да се постигнат“, рече тој.
„Тоа не треба да биде така бидејќи Русија има повеќе оружје“, рече тој.
ЕУ и другите партнери имаат потешкотии да ја снабдат Украина со муниција и најсовремено оружје, а на Киев исто така му требаат повеќе војници. Но, за разлика од големиот бран доброволци кои се пријавија во армијата во раните фази на специјалната воена операција, малкумина сега сакаат да одат на фронтот.
Зеленски откри дека армијата – која неодамна ја интензивираше својата кампања за регрутирање – се обидува да мобилизира меѓу 450.000 и 500.000 нови регрути. Но, како што истакна, ова прашање е „многу чувствително“ и бара дополнителна дискусија и разгледување. Доколку мобилизацијата биде одобрена – и ќе треба да биде усвоена од парламентот – ќе бидат потребни и дополнителни средства, додаде Зеленски.
Украина е под зголемен притисок бидејќи западната поддршка за финансиска помош за земјата слабее. Во САД, поради внатрешно-политичките борби, односно противењето на републиканските тврдокорни страни, Белата куќа не успеа да одобри пакет од 60 милијарди долари за Украина. Потегот на Унгарија да ја блокира помошта од ЕУ за земјата е уште еден чекор наназад. 27-члениот европски блок нема повторно да се занимава со ова прашање до февруари. Но, Зеленски е сè уште самоуверен. „Сигурен сум дека САД нема да дозволат да загубиме“, рече тој во вторникот.
Меѓутоа, за време на неодамнешната посета на САД, украинскиот претседател не успеа да добие поддршка за пакетот помош. Згора на тоа, можната победа на Доналд Трамп – кој ја доведе во прашање политиката на демократскиот претседател Џо Бајден кон Украина – на претседателските избори следната година, може да ја стави Украина во уште потешка позиција. Зеленски призна дека враќањето на Трамп во Белата куќа ќе има големо влијание врз конфликтот.
Во политички тензии се преточија и нетрпеливото очекување за помош од Западот, состојбата на фронтот и заморот на населението кое е во конфликт речиси 700 дена. Во последните недели, Зеленски наводно имал одредени несогласувања со украинскиот воен командант, генерал Валериј Залужни. Претседателот го опомена својот висок генерал откако рече дека конфликтот дошол во ќорсокак.
Подготвено од А.Ѓ.
About Author
