28.12.2023 Скопје
Администрацијата на Хавиер Мајли, новиот претседател на Аргентина, соопшти дека ќе отпушти повеќе од 5.000 државни службеници кои беа ангажирани оваа година, пред тој да ја преземе функцијата.
Овој потег е дел од планот за сеопфатно намалување на трошоците и монетарни реформи, чија цел е трансформација на економијата на Аргентина, објавен од десничарот Мајли кога ја презеде функцијата на 10 декември.
Ќе се продолжат договорите со други државни службеници кои биле ангажирани пред 2023 година, соопштија државните претставници.
Отпуштањата веќе предизвикаа протести, но Мајли вети дека ќе продолжи.
Со оглед на тоа што инфлацијата се очекува да достигне околу 200 отсто до крајот на годината, Мајли вети дека ќе ја намали државната бирократија и трошоци и ќе дозволи приватизација на државните индустрии како начин за зголемување на извозот и инвестициите.
Околу 300 претходно најавени законски измени ќе овозможат приватизација на многу државни претпријатија и олабавување на заштитата за станарите, вработените и клиентите.
Други чекори вклучуваат девалвација на аргентинскиот пезос за 50 проценти, намалување на субвенциите за енергија и транспорт и затворање на некои владини министерства.
Подготвено од А.Ѓ.
About Author
