29.12.2023 Скопје
Новата вакцина во развој е насочена кон лошиот холестерол и нуди нова надеж за намалување на кардиоваскуларните болести на достапен и ефикасен начин.
Во подготовка е револуционерна вакцина која нуди потенцијално решение за широко распространетиот проблем со високиот холестерол, кој погодува речиси 40 отсто од возрасните во САД. Таа иновативна инјекција, која моментално е во развој, го таргетира лошиот холестерол, особено липопротеините со ниска густина (ЛДЛ), за кои е познато дека предизвикуваат затнување на артериите и го зголемуваат ризикот од мозочен удар.
Во истражувањето на научниците од Универзитетот во Ново Мексико и Универзитетот во Калифорнија, вакцината цели на клучниот протеин, протеин конвертаза субтилизин/кексин тип 9 (PCSK9), поврзан со ЛДЛ.
Вакцината се заснова на неинфективна вирусна честичка, само обвивка од вирусот, која може да се користи за развој на вакцини против разни проблеми, објаснува молекуларниот генетичар Брајс Чакериан.
Специјалните рецептори на црниот дроб го регулираат нивото на LDL, но вишокот PCSK9 може да ги инхибира овие рецептори, дозволувајќи повеќе лош холестерол во крвотокот. Со комбинирање на мали парчиња PCSK9 со неинфективна вирусна честичка, научниците предизвикаа имунолошки одговор кој го неутрализираше наведениот штетен протеин.
Резултатите од тестовите на глувци и мајмуни ја покажале способноста на вакцината да го намали лошиот холестерол во крвта и до 30 отсто. За разлика од сегашните PCSK9 инхибитори, новото решение нуди споредлива ефикасност, со потенцијално пониска цена. Чакериан ја нагласува целта да се развие тој нов пристап, кој е поевтин и пошироко применлив.
Додека вакцината подготвена за луѓе е сè уште далеку, ветувачките резултати досега даваат надеж за поприфатлива алтернатива, која трае околу една година по доза.
Научниците се оптимисти за потенцијалното влијание врз речиси 18 милиони животи кои годишно се губат поради кардиоваскуларни болести.
Се надеваме дека ќе имаме вакцина кај луѓето во следните 10 години, вели Чакериан, признавајќи ја обемната временска рамка која претстои за евентуалното воведување на таа нова инјекција.
Со повеќе од една деценија развој зад себе, следната фаза на истражување вклучува испитувања на луѓе, кои бараат дополнително истражување и финансирање за потенцијална револуција во кардиоваскуларното здравје.
Подготвено од А.Ѓ.
About Author
