22.11.2023 Скопје
Украинскиот претседател Володимир Зеленски изјави дека Украина ги донела сите одлуки што требало да бидат донесени за почеток на преговорите за пристапување на земјата во Европската унија.
Зеленски потсети дека во вторникот претседателот на Европскиот совет, Шарл Мишел и претседателката на Молдавија, Маја Санду, престојуваа во Киев на десетгодишнината од почетокот на Мајдан, што, како што рече, е особено симболично.
„Главната тема беше нашата интеграција во Европската унија. Нашата земја прави се што е потребно за правилен почеток на пристапните преговори. Сите одлуки што требаше да ги донесеме се веќе донесени. А сега дури и ќе одобриме што требаше да се направи пред пролет“, рече Зеленски во видео обраќање.
Според него, Украина е апсолутно решена да спроведе се и да биде целосно подготвена за почеток на преговорите.
„Многу е важно Европската унија да го исполни своето ветување со донесување одлука за почеток на преговори со Украина“, нагласи тој.
Зеленски изрази благодарност до претседателот на Европскиот совет Шарл Мишел и до сите партнери во Европа за нивната поддршка“ и истакна дека „сега е време да се зајакне солидарноста“.
На 8 ноември, Европската комисија му препорача на Европскиот совет да ги отвори преговорите за пристапување на Украина и Молдавија во ЕУ.
Таа, исто така, препорача, под одредени услови, отворање на преговорите со Босна и Херцеговина и доделување статус на земја кандидат за Грузија.
Во декември Европскиот совет треба да го разгледа прашањето за почеток на преговори за пристапување на Украина во ЕУ.
Подготвено од А.Ѓ.
About Author
