22.11.2023 Скопје
Германското Министерство за финансии воведе замрзнување на трошоците за сите сојузни министерства, продлабочувајќи ја буџетската криза што ја потресе владејачката коалиција по судската одлука минатата недела.
Одлуката на Министерството за финансии да ги стопира повеќето нови одобренија за трошење уследи по одлуката на Уставниот суд, кој остави дупка во владината каса од 60 милијарди евра.
Владата сега се подготвува за можноста за многу пошироки финансиски импликации кои произлегуваат од пресудата, што би можело да ја ограничи нејзината способност да повлекува пари од различни специјални фондови формирани за да се заобиколи „сопирачката за долг“ на земјата, која го ограничува федералниот дефицит на 0,35 отсто од БДП-а, освен во итни ситуации.
Во писмото до сите министерства, државниот секретар Вернер Гацер рече дека Министерството за финансии ги замрзнува трошоците „за да избегне тешки денови во идните финансиски години“. Тој чекор не влијае на финансиските обврски кои се веќе преземени, изјави вчера генералниот секретар на СПД, Кевин Кинерт.
Членовите на комисијата за финансии на Бундестагот утринава одржаа јавна расправа со правни експерти за да го проценат влијанието на минатонеделната судска одлука.
Иако финансиската дупка од 60 милијарди евра по пресудата теоретски се протега во текот на неколку години, во пракса ефектот ќе биде понепосреден, рече Тис Бутнер, професор на Универзитетот во Ерланген-Нирнберг.
„Потребна е консолидација во планирањето на буџетот за следната година од 52 милијарди евра“, рече тој.
Неможноста на владата да ги најде парите потребни за финансирање на нејзината сеопфатна агенда за забрзување на зелената транзиција и заштита на германската индустрија од високите трошоци за енергија доведува до зголемени повици од левицата до владата да ја прекине сопирачката за долгот со прогласување вонредна состојба, како што беше за време на пандемијата на коронавирус.
Членовите на Слободната демократска партија (ФПД) досега се спротивставија на повиците да се прекине сопирачката за долгот. Министерот за финансии на ФПД, Кристијан Линднер, минатата недела заклучи дека одлуката на уставниот суд не го оправдува суспензијата на должничката кочница.
„Ќе мораме да правиме поефективни политики со помалку пари отколку во последната деценија“, рече тој.
Сепак, други во владата се залагаат за фундаментална реформа на должничката сопирачка што беше воведена во 2009 година.
„Начинот на кој е конструирана германската должничка кочница не е доволно интелигентен“, изјави вчера министерот Роберт Хабек. Кочницата за долгот, вели тој, е создадена во едно поинакво време, „кога секогаш имавме евтин гас од Русија, кога Кина беше секогаш нашиот пазар за купување и кога Американците беа секогаш сигурни, лојални пријатели и го симнуваа воениот товар од нашите рамења, бидејќи во Европа немаше војна“.
Подготвено од А.Ѓ.
About Author
