11.11.2023 Скопје
Исланд прогласи вонредна состојба, а полициските службеници ги повикуваат жителите да го евакуираат крајбрежниот град Гриндавик по силниот земјотрес на југозападниот дел на земјата поврзан со можна вулканска ерупција.
Од полноќ до 14 часот во петокот се регистрирани речиси 800 земјотреси на длабочина од 3-3,5 километри, соопшти Исландскиот метеоролошки институт.
Во изјавите во петокот, Агенцијата за цивилна заштита на Исланд рече дека тунел од формирање магма може да стигне до Гриндавик, додека исландските власти рекоа дека е невозможно да се каже дали и каде магмата може да избие на површината.
„Земјотресите може да станат посилни од оние кои веќе се случиле, а оваа серија на настани може да доведе до ерупција. Сепак, сè уште нема знаци на приближување на магмата до површината. Нејзиното движење внимателно се следи”, соопшти Агенцијата за цивилна заштита.
Магмата е мешавина од стопена и полурастопена карпа која се наоѓа под површината на Земјата, која може да еруптира кога ќе го најде патот до површината, станувајќи лава.
Надлежните ги повикаа жителите на мирна евакуација и нагласија дека нема непосредна опасност.
„Сакаме да повториме дека жителите мора да ги евакуираат своите домови и да го напуштат градот. Исто така, сакаме да повториме дека ова не е итна евакуација и дека има доволно време да се подготват, да се обезбедат работите и мирно да го напуштат градот“, велат од Агенцијата за Цивилна заштита.
„Јасно е дека се занимаваме со настани што ние Исланѓаните не сме ги доживеале до сега, барем не од ерупцијата во Вестманејар. Заедно се соочивме со тоа и нема да паднеме во срцето“, додаваат од Агенцијата за цивилна заштита.
Американската амбасада во Исланд издаде тревога за вулкан, предупредувајќи на зголемени знаци на вулканска активност.
„Доколку дојде до ерупција, следете ги инструкциите на исландските власти. Вулканските опасности може да вклучуваат лава, токсични гасови и тежок чад од пожари од лава“, се вели во соопштението.
Светски познатиот термички базен Сина лагуна во областа веќе е затворен поради тековната сеизмичка активност.
Од 2021 година, има ерупција речиси на секои 12 месеци, а последната се случи во јули јужно од главниот град на Исланд, Рејкјавик.
Исланд се наоѓа на границата на тектонска плоча која постојано се одвојува, потиснувајќи ги Северна Америка и Евроазија една од друга по линијата на сртот на Средниот Атлантик. Во него има 32 активни вулкани.
Подготвено од А.Ѓ.
About Author
