03.11.2023 Скопје
Во видео обраќање лидерот на проиранското шиитско движење Хезболах, Хасан Насрала, изјави дека она што се случува моментално во Газа „не е битка како другите“, туку „решавачка војна по која ништо нема да биде како порано“.
За време на церемонијата на комеморација на жртвите од израелските напади јужно од Бејрут, упориште на „Божјата партија“, Насрала додаде дека оваа решавачка војна е историска и секој мора да ги преземе своите сопствени одговорности.
„Мораме да поставиме непосредни цели: првата е да се запре агресијата и војната против Газа. Втората е победа на исламскиот отпор, особено на Хамас во Газа“, рече Насрала, нагласувајќи дека „победата на палестинскиот народ е победа на сите народи во регионот: победата на Газа е либански национален интерес“.
Исто така, тој додаде дека победата на Израел и поразот на отпорот во Газа ќе има влијание врз Либан на безбедносно, демографско и национално ниво.
Насрала денеска изрази сочувство за луѓето кои загинаа по операцијата „Поплава во Ал Акса“, односно нападот на 7 октомври што го започна палестинското исламистичко движење Хамас против Израел, велејќи дека е „подготвен за жртва“. Ова се првите зборови од говорот на либанскиот лидер за време на церемонијата на комеморација на жртвите од израелските напади јужно од Бејрут, упориште на Хезболах.
„Сè што се случува ја покажува директната одговорност на САД за масакрите. САД се одговорни за војната во Газа, а Израел е само алатка во нивните раце. Треба да ги казниме САД за она што го прават во нашиот регион. Отпорот во Ирак ги напаѓа американските бази во Ирак и Сирија за да ги натера да ја платат цената за овие злосторства. Ова е мудра одлука на командата на отпорот во Ирак. Им оддаваме почит на овие борци“, додаде лидерот на „Божјата партија“.
„Сите жртви на Газа се маченици, тие се движат кон друг свет што го навестуваат пророците, сега се таму каде што нема диктатури и нема ционисти. Ниту една војна не е понеправедна од оваа“, рече лидерот на либанската „Божја партија“, сојузник на Иран.
„Нашата сила е нашата посветеност на каузата, жртвата е нашето оружје. Ги поздравуваме легендарните луѓе, луѓето од Газа кои ги видовме на телевизија како излегуваат од под урнатините“, рече Насрала.
„Подготвени сме да се жртвуваме, подготвени сме да дадеме се од себе“, додаде тој во видео пораката што ја слушаа илјадници луѓе на улиците на Бејрут.
Од минатиот 7 октомври, датумот на нападот на Хамас врз Израел со кој започна конфликтот, има борби и по Сината линија, де факто границата меѓу Израел и Либан. Во судирите загинаа најмалку 55 борци на Хезболах.
Подготвено од А.Ѓ.
About Author
