21.11.2023 Скопје
За прв пат по уривањето на тунелот во северната индиска држава Утараханд, снимени се работниците заробени во тунелот. Девет дена во тунелот се 41 работник.
Видеото е снимено со помош на ендоскопска камера која вчера била помината низ нова цевка издупчена во тунелот. Спасувачите користеле и цевка за да им го дадат на работниците првиот топол оброк по девет дена.
Работниците до сега се прехрануваа со грицки кои се праќаа преку потесна туба вметнато претходно. Тунелот во изградба се урна утрото на 12 ноември по лизгање на земјиштето. Набргу потоа е воспоставен контакт со затрупаните работници и оттогаш им се обезбедува кислород, храна и вода.
Спасувачите синоќа успеаја да протуркаат цевка со дијаметар од околу 15 сантиметри низ остатоците во внатрешноста на тунелот. Тие ставија мала камера прикачена на флексибилен кабел во цевката и ја искористија за да ги снимаат заробените мажи.
На видеото објавено на интернет, може да се видат спасувачите како гледаат снимка на компјутерски екран надвор од тунелот. Еден спасувач бара од мажите да се појават пред камерата, да се насмевнат и да замавнат. На видеото се гледа како работниците одговараат на инструкциите. Спасувачите им рекле дека наскоро ќе бидат спасени и побарале да се легитимираат пред камера.
Судејќи според видеото, комуникацијата меѓу затрупаните работници и спасувачите се одвива преку воки-токи. На видеото се гледа дека многу работници носат заштитни шлемови и јакни. Спасувачот им рекол на работниците дека цевката наскоро ќе биде исчистена, по што ќе им биде испратена вода.
Новата цевка е поширока од цевката со дијаметар од 10 сантиметри, која спасувачите ја вметнале во тунелот неколку часа по уривањето на делот. Цевката е многу тесна, па досега на работниците можеа да им се даваат само одредени закуски, како суво овошје. Цевката се користела и за снабдување со кислород до нив.
Спасувачите во видеото велат дека новата, поширока цевка ќе им помогне на работниците да им снабдат повеќе кислород, храна и други неопходни работи, како што се лекови, мобилни телефони и полначи. Спасувачите со помош на цевче им го доставиле првиот зготвен оброк на работниците за девет дена. Станува збор за јадење со ориз и леќа, спакувано во шишиња.
Спасувачите планираат да ископаат дупка доволно широка за да постави цевка од 900 мм, која работниците би можеле да ја искористат за да се извлечат од тунелот. Сепак, спасувачите вчера соопштија дека се обидуваат да ископаат уште два тунели до главниот, како дополнителни спасувачки рути.
Во неделата, федералниот министер за автопати и патишта Нитин Гадкари го посети местото и рече дека операциите за спасување може да траат два до три дена.
Подготвено од А.Ѓ.
About Author
