18.11.2023 Скопје
Научниците во главниот град на Индија, Њу Делхи, подготвија планови да предизвикаат вештачки дожд во неконвенционален обид за намалување на смогот додека властите се борат да го ублажат катастрофалното загадување на воздухот.
Планот вклучува фрлање сол или сребрен јодид во облаците од авионите за да се поттикне формирањето на капки дожд во процес познат како „сеење облаци“. Научниците се надеваат дека дождот произведен на овој начин може да помогне да се отстрани загадувањето од атмосферата.
Регионалната влада на Делхи, која го организира проектот со научници од индискиот Институт за технологија, Канпур, и чека одобрение од националните владини тела, се надева дека ќе го финализира проектот оваа недела.
Планот беше лансиран откако квалитетот на воздухот во северна Индија се врати на кризно ниво. Делхи беше најзагаден град во светот оваа недела, според швајцарската апликација IQAir.
Индексот на квалитетот на воздухот на IQAir, кој ги мери нивоата на смртоносни загадувачи како што се многу мали честички познати како PM2.5, рутински се искачува над 400 во Делхи во ноември – ниво кое се смета за „смртно опасно“ за 30 милиони жители на главниот град.
Студијата оваа година на Универзитетот во Чикаго го нарече загадувањето на воздухот како најголема закана за здравјето на луѓето во Индија, бидејќи се верува дека го скратува животниот век на просечниот Индиец.
Сепак, не сите се согласуваат со овој неконвенционален метод за отстранување на загадувањето од воздухот. Јојди Пандре Лавакаре, активист во борбата за чист воздух, вели дека овој план е само обид на властите да се преправаат дека нешто прават.
Меѓународното внимание на загадувањето на воздухот во Индија стана извор на срам за владата на премиерот Нарендра Моди. За време на Светското првенство во крикет овој месец, играчите од Шри Ланка, Бангладеш и Англија ги прескокнуваа тренинзите или користеа инхалатори за астма за да се борат со нечистиот воздух.
Научните докази за ефикасноста на напорите за промена на временските услови се ограничени, но индиските власти велат дека претходното сеење облаци за време на сезоната на монсуните има одреден успех во зголемувањето на врнежите во областите склони кон суша. Научниците се надеваат дека ќе „сеат“ околу 300 квадратни километри облаци над Делхи, но прифаќаат дека планот зависи од доволно влага во воздухот во наредните недели.
Подготвено од А.Ѓ.
About Author
