07.11.2023 Скопје
Генералниот секретар на ОН, Антонио Гутереш, предупреди дека „никој не е безбеден“ во Газа и повтори дека итно е потребен хуманитарен прекин на огнот.
„Ситуацијата во Газа е повеќе од хуманитарна криза, тоа е криза на човештвото. Газа станува гробница за деца, со стотици момчиња и девојчиња убиени или повредени секој ден“, рече Гутереш, истакнувајќи дека израелските воени операции се насочени кон цивили, болници, бегалски кампови, џамии, цркви и објекти на ОН, вклучително и засолништа.
Тој изјави дека заштитата на цивилите е најважна.
„Длабоко сум загрижен поради очигледното кршење на меѓународното хуманитарно право на кое сме сведоци. Да бидам јасен, ниту една страна во вооружениот конфликт не е над меѓународното хуманитарно право“, рече Гутереш.
Тој посочи дека во последните четири недели се убиени повеќе новинари отколку во кој било конфликт во последните 30 години.
„Убиени се повеќе хуманитарни работници на ОН отколку во кој било споредлив период во историјата на нашата организација“, изјави Гутереш и посочи дека хуманитарната помош што пристигнува преку граничниот премин Рафах не е ни приближно доволна за 2,7 милиони луѓе во Газа.
Тој нагласи дека нешто повеќе од 400 камиони со хуманитарна помош преминале во Газа во изминатите две недели и дека пред почетокот на војната меѓу Израел и палестинската милитантна група Хамас, околу 500 од нив поминувале секој ден, и додаде дека ниту еден од камионите што го преминаа Рафах во последните две недели не испорача гориво.
„Без гориво умираат бебиња во инкубатори, а и пациенти на апарати за одржување живот. Водата не може да се пумпа или прочистува. Наскоро, суровата канализација би можела да почне да блика на улиците, што дополнително ќе шири болести“, рече Гутереш.
Подготвено од А.Ѓ.
About Author
