02.11.2023 Скопје
Според најновите податоци, годишно грипот погодува меѓу пет и 10 проценти од возрасните и меѓу 20 и 30 проценти од децата ширум светот, а најдобар начин за заштита е годишната вакцинација.
Сезонскиот грип е акутна вирусна инфекција предизвикана од различни видови на вирусот на грип кои циркулираат во светот.
Кога човек ќе го прележи грипот предизвикан од еден вид на вирус, тој имунитет не го штити од друг вид вирус.
Грипот се пренесува кога пациентот кива, кашла или зборува, а со раце ја допира устата или носот или го пренесува вирусот од предмети како кваки, тастатури, телефони и друго.
Симптомите на грипот се треска, покачена телесна температура, кашлица, кивање, болки во мускулите и зглобовите, екстремен замор, главоболка, но и дијареа и повраќање.
На овие симптоми може да се додадат и компликации од грипот, најчесто во респираторниот систем, воспаление на увото, синусите, белите дробови, но може да се зафатат и други системи на органи.
Основниот третман на грипот е симптоматски и вклучува одмор, замена на течности, земање лекови за намалување на температурата и смирување на кашлицата, земање лесно сварлива храна со што повеќе овошје.
Бидејќи грипот е предизвикан од вируси, антибиотиците не се користат, па со нив може да се лечат само бактериски компликации.
Најдобар начин за заштита од сезонски грип е годишната вакцинација, која се користи повеќе од 60 години и содржи мртви вируси, кои не можат да предизвикаат болест, но поттикнуваат развој на отпорност.
Вакцинацијата против грип особено се препорачува за хронични пациенти, постари лица, лица кои професионално или приватно се во контакт со ризични групи кои лесно можат да ја пренесат инфекцијата на нив, сите здравствени работници и вработени во сектори и служби од јавно значење/полиција, образование, комунални претпријатија, вработени во градинки/, луѓе кои се грижат за мали деца.
Потребни се околу две недели по вакцинацијата за телото да развие антитела кои штитат од грип.
Покривање на устата при кашлање или кивање, по можност со марамче што треба да се фрли по секоја употреба, редовно миење раце со топла вода и сапун, проветрување на просторијата неколку пати на ден, избегнување големи собири или близок контакт со други луѓе како општи мерки за заштита од грип.
Како мерка за заштита од грип не треба да се оди во домашни или болнички посети доколку некој има респираторна инфекција.
Подготвено од А.Ѓ.
About Author
