08.11.2023 Скопје
Шефот на европската дипломатија, Жозеп Борел, изјави дека Европската унија планира наскоро да ја забрани трговијата со руски дијаманти откако ќе обезбеди доволна поддршка од групата Г7 за тој чекор.
„Некои земји од ЕУ бараа, на пример, политичко покритие за да се приклучат на едногласната забрана за трговија со руски дијаманти. Тоа беше направено. Координацијата успеа и ќе можеме да го ставиме пакетот санкции пред министрите за надворешни работи на ЕУ во понеделник“, рече Борел.
Украина и некои од нејзините сојузници долго време бараат ЕУ да ја забрани трговијата со руски дијаманти, но Белгија тврди дека овој потег само ќе ја пренасочи трговијата со скапоцени камења подалеку од белгискиот град Антверпен – глобалниот центар за дијаманти.
Белгиските власти повикаа на целосна поддршка на Г7 за аранжман кој ќе спроведе глобален стандард за сертификација на груби и исечени дијаманти и ќе им овозможи на сите трговци да идентификуваат скапоцени камења произведени во Русија.
Русија е најголемиот светски производител на необработени дијаманти, а вредноста на нејзиниот извоз во 2021 година изнесуваше четири милијарди долари.
Повеќе од 80 отсто од необработените дијаманти во светот се купуваат или продаваат преку дилери во Антверпен.
Подготвено од М.Д.
About Author
