21.11.2023 Скопје
Израел мора да ги преземе сите неопходни мерки на претпазливост за да избегне цивилни жртви за време на тековната воздушна и копнена кампања во Газа против палестинската група Хамас, изјави шефот за надворешна политика и безбедност на ЕУ, Жозеп Борел.
Страшниот напад на Хамас врз еврејската држава не го оправдува ужасот на цивилите во Газа, изјави Борел.
Осудувајќи го нападот на Хамас врз Израел, тој призна дека е „малку пропалестински настроен“.
Борел изјави дека ги потсетил израелските власти дека „војната има свои правила“ и дека бомбардирањата мора да се разгледуваат од перспектива на жртвите што тие ги предизвикуваат, бидејќи хуманитарната ситуација во Газа е ужасна.
Борел изрази неизвесност за израелските тврдења дека целта на тешките напади врз зградите во Газа е да се уништат подземните тунели изградени од Хамас.
„Тоа е, не е, лично – не знам. Тие се сомневаат дека е“, нагласи Борел.
Претставници на Хамас во многу наврати потврдија дека имаат широка мрежа на тунели во Газа, за кои се верува дека се протегаат до Египет, и рекоа дека тие се наменети да се спротивстават на израелската „окупација“.
Борел истакна дека конфликтот меѓу Израел и Палестинците „не може да се реши со масовен егзодус на повеќе од два милиони“ луѓе од Газа и дека само политичкото решение има шанси за успех.
„Ако Израел сака да изгради мир, тогаш повеќе не може да сее омраза“, истакна Борел.
Тој додаде дека исходот од конфликтот во голема мера зависи од тоа дали двете страни ќе можат да преговараат за ослободување на повеќе од 240 заложници кои ги држи Хамас.
Откако почнаа непријателствата на 7 октомври, ЕУ го призна правото на Израел на самоодбрана и ги поддржа повиците за хуманитарна пауза. Сепак, некои европски земји, како и САД, кои се главниот поддржувач на Израел, не сакаа да ги повикаат двете страни да се согласат на прекин на огнот, наведувајќи ја загриженоста дали таков договор ќе ја гарантира идната безбедност на земјата.
Подготвено од А.Ѓ.
About Author
