16.10.2023 Скопје
Студија покажа дека редовната умерена до енергична физичка активност во текот на неделата има сличен ефект врз кардиоваскуларното здравје како и умерената до енергична физичка активност во текот на еден до два дена, обично за време на викендот.
Резултатите од студијата објавена во „Џама трастед сорс“ покажуваат дека и „викенд-вежбачите“ и оние што редовно вежбаат во текот на неделата имаат помал ризик од срцев удар, атријална фибрилација, срцева слабост и мозочен удар.
Физичката активност несомнено е корисна за кардиоваскуларното здравје, но со оглед на денешниот брз начин на живот, често е тешко луѓето да се вклучат во редовни активности во текот на работната недела.
Истражувачите потсетија дека препораката за физичка активност е околу 150 минути умерена до енергична физичка активност неделно. Тие сакаа да откријат дали постои разлика во здравствените придобивки на две групи вежбачи – луѓе што имаат умерена до енергична физичка активност два дена во неделата (т.н. „викенд-вежбачи“) и оние што ја распределуваат својата физичка активност порамномерно во текот на неделата.
За да направат прецизна споредба, во студијата вклучиле и група вежбачи чија физичка активност изнесувала помалку од 150 минути неделно. Оваа група не го достигнала препорачаниот неделен праг на вежбање и затоа се сметала за неактивна.
Во истражувањето учествувале речиси 90.000 луѓе со просечна возраст од 63 години. Сите учесници носеле акцелерометри на зглобовите една недела за да го забележат нивото на физичка активност.
Врз основа на нивото на активност, истражувачите ги класифицирале учесниците како „викенд-вежбачи“, оние што редовно вежбаат во текот на неделата и оние што се неактивни.
Групата викенд-вежбачи ја сочинувале околу 42 отсто од испитаниците, 24 отсто биле во групата што редовно вежба, а 33,7 отсто биле оценети како неактивни. Кога ги анализирале податоците, научниците ги зеле предвид возраста, степенот на образование и пушењето.
По шестгодишно следење на учесниците во студијата се покажало дека ризикот од развој на срцев удар во споредба со физички неактивните луѓе е 35 отсто помал кај дневно активните луѓе и 27 отсто помал кај викенд-вежбачите.
Ризикот од развој на атријална фибрилација и срцева слабост во двете групи бил ист – 20 до 27 отсто помал. Слични резултати биле пронајдени кај луѓе што вежбале околу 230 минути неделно.
Целокупната активност, а не времето, се чини дека е важна за подобрување на кардиоваскуларното здравје. Д-р Џон Бахадорани, интервентен кардиолог во Институтот за кардиоваскуларно здравје при Медицинскиот центар Седлбек во Калифорнија, кој не бил вклучен во студијата, ги посочи клучните придобивки од вежбањето и физичката активност.
Подготвено од А.Ѓ.
About Author
