16.10.2023 Скопје
Заборавете на филтрите и фотошопот, вештачката интелигенција (AI) е новиот тренд за креирање на онлајн профилни фотографии.
Во текот на летото, видео за тоа стана вирално на TikTok со следниов наслов: Користете го овој тренд за да добиете нова фотографија на профилот на LinkedIn.
Во краткиот клип, младата жена покажува како изгледа во реалниот живот, како и фотографии од својот професионален, односно негуван изглед што ги постигнала со помош на апликацијата Remini со вештачка интелигенција.
Видеото е прегледано повеќе од 50 милиони пати, а многу слични клипови од други тиктокери се исто така прегледани безброј пати. Remini, и конкурентите како Try It On AI и AI Suit Up, користат софтвер заснован на вештачка интелигенција за да креираат „полирани“ профилни фотографии кои треба да изгледаат како дело на професионален фотограф.
Со Remini, од корисниците се бара да прикачат од осум до 10 селфиња, по можност снимени од различни агли и сите во добро осветлување. Вештачката интелигенција, всушност, ги користи тие слики за да „научи“ како изгледате, а потоа по само неколку минути почнува да создава вештачки фотографии на кои изгледате „многу паметно, па дури и гламурозно“ со стилизирана коса.
Исто така ви дава можност да носите разновидна облека, со професионално осветлување и да имате беспрекорен тен и шминка. Плус, добивате различни позадини, а некои корисници сметаат дека тоа ги прави да изгледаат послаби.
Резултатите се, до одреден степен, во очите на гледачот – некои велат дека се реални, додека други мислат дека сликите изгледаат вештачки. Но, додека претходните трендови на „онлајн манипулација со фотографии“ – како што е драстичното менување на бојата на косата или очите – се фокусираа на забавата на социјалните мрежи, овој тренд е главно фокусиран на LinkedIn и други веб-страници за ловење работа.
Предноста е што Remini и другите провајдери генерално ќе ви даваат бесплатни проби во траење од неколку дена, додека ангажирањето фотограф може скапо да ве чини.
Подготвено од А.Ѓ.
About Author
