20.10.2023 Скопје
Западните власти предупредуваат дека опасноста од регионално „прелевање“ на војната меѓу Израел и Хамас е реална, откако американските сили во регионот се соочија со зголемени закани, а американските бази во Ирак и Сирија повторно беа цел на напади со беспилотни летала.
Претседателката на Европската комисија Урсула фон дер Лајен рече дека ризикот од регионално прелевање на војната меѓу Израел и Хамас е „реален“.
Говорејќи во Институтот Хадсон во Вашингтон, Фон дер Лајен исто така рече дека дијалогот меѓу Израел и неговите соседи мора да продолжи.
„Видовме арапски улици полни со гнев низ целиот регион. Значи, ризикот од регионално прелевање е реален“, рече таа, додавајќи дека „Иран, спонзорот на Хамас, сака само да го разгори огнот на хаосот“.
Катаиб Хезболах, моќна вооружена фракција со блиски врски со Иран, ги обвини САД дека го поддржуваат Израел во „убивањето невини луѓе“ и рече дека треба да го напуштат Ирак. Во изминатите години, иранските милиции во Ирак редовно ги гаѓаа американските сили во Ирак. Ваквите напади престанаа со прекинот на огнот што беше во сила од минатата година, а Ирак уживаше период на релативен мир.
Израел објави план за евакуација на Кирјат Шмона, град во северната израелска област што граничи со Либан. Жителите на град во близина на границата, преку кој израелските војници и милитантите во Либан разменија оган, ќе бидат преместени во куќи за гости субвенционирани од државата, соопшти Министерството.
Кирјат Шмона има повеќе од 20.000 жители и е на околу километар и половина од границата. Наредбата беше одобрена од израелскиот министер за одбрана Јоав Галант и му беше доставена на градоначалникот на градот „неодамна“, се вели во соопштението на израелските одбранбени сили (ИДФ), објавено на социјалната платформа Х.
Подготвено од А.Ѓ.
About Author
