24.10.2023 Скопје
Европската унија упати формално барање до компаниите Мета и ТикТок да обезбедат информации во рок од една недела за можното ширење на дезинформации на нивните платформи, особено оние поврзани со конфликтот меѓу Израел и Хамас во Појасот Газа.
Оваа формална обврска доаѓа откако и двете компании претходно имаа 24 часа да одговорат на првичните барања на Унијата, но тие барања немаа сила на закон. Овој пат, доколку ЕУ не е задоволна со одговорите, можно е да се започне формална истрага според новиот Закон за дигитални услуги (DSA).
Европската унија изразува загриженост поради можното ширење на терористичка и насилна содржина, како и говор на омраза, по нападот на Хамас врз Израел.
Портпаролите на Мета и ТикТок ја истакнаа нивната посветеност на безбедноста и транспарентноста.
„Нашите тимови работат деноноќно за да ги зачуваат нашите платформи безбедни и да преземат акција за содржината што ги прекршува нашите упатства или локалните закони“, рече портпаролот на Мета.
„Ќе бидеме среќни да обезбедиме дополнителни детали за оваа работа, надвор од она што веќе го споделивме, и ќе одговориме до Европската комисија“, додадоа од Мета.
Минатата недела, ЕУ, исто така, контактираше со компанијата X, порано позната како Твитер, со слични барања и грижи. Во својот одговор, Х посочи дека отстраниле стотици сметки поврзани со Хамас од платформата.
Оваа мерка претставува прв сериозен тест за Законот за дигитални услуги, нова законодавна рамка на ЕУ која предвидува казни до 6% од глобалниот промет на компанијата, па дури и целосно суспендирање на услугите за оние кои не ги исполнуваат барањата.
Подготвено од А.Ѓ.
About Author
