29.09.2023 Скопје
Српскиот претседател Александар Вучиќ изјави дека причина за сите проблеми на Косово е Албин Курти.
Тој ги отфрли сите обвинувања за каква било вмешаност на Србија во инцидентот во Бањска, бидејќи тоа што се случи секако не му одговара на Белград.
Вучиќ рече дека Албин Курти сака да ги протера Србите од Косово и да го блокира компромисното решение неопходно за поправка на односите меѓу Белград и Приштина.
„Причина за сите проблеми на Косово е Албин Курти. Тој е тој што го донесе сето ова“, рече Вучиќ.
Тој рече дека одбивањето на Курти да формира Заедница на српски општини, тело кое, според условите од договорот од 2013 година меѓу Белград и Приштина, ќе им обезбеди на косовските Срби поголема автономија, ги поттикна тензиите што доведоа до насилство во Бањска.
„За нас позицијата во Косово е очигледно ужасна, но… Мораме да бидеме со нашиот народ… Да се обидеме да го зачуваме мирот“, рече Вучиќ и изјави дека решението секогаш е во дијалог.
Тој потсети дека Белград го осудува убиството на полицаецот во Бањска и додаде дека Србија „ќе покрене постапка пред надлежните судски органи“ и ќе ги испита осомничените.
„Кои се кривичните дела, тоа е прашање на обвинителот“, рече Вучиќ.
Тој ја обвини самопрогласената косовска полиција дека убила еден од вооружените лица „од далечина од еден метар“ откако тој се предал, опишувајќи го тоа како „егзекуција“.
Вучиќ ги негираше наводите на косовската претседателка Вјоса Османи дека Белград поттикнува насилство, велејќи дека Србија нема да има корист од тоа, бидејќи тоа ќе ја загрози нејзината позиција во преговорите со Приштина спонзорирани од ЕУ.
„Зошто ова би било корисно за Белград? Која би била идејата? Да се уништи нашата позиција што ја градевме една година? Да се уништи ова за еден ден? Србија не сака војна“, рече Вучиќ.
Тој рече дека Србија ќе го испита потеклото на оружјето што по инцидентот го запленила полицијата на самопрогласеното Косово.
Тој изјави и дека Милан Радоичиќ, кој, според властите во Приштина, бил присутен на престрелката, „ќе биде повикан од обвинителот“.
Подготвено од А.Ѓ.
About Author
