07.09.2023 Скопје
Денеска првиот заменик-премиер на Украина, Јулија Свириденко, изјави дека Украина има почнато да извезува жито преку хрватските поморски пристаништа, со цел да ги прошири извозните рути додека нејзините црноморски пристаништа се блокирани.
„Ние сме благодарни за оваа можност. Иако е само дел од трговскиот пат, таа е веќе корисна“, наведе таа во писмената изјава, без да даде информации колку украинско жито веќе е испорачано преку хрватските пристаништа.
Таа додаде дека Киев е подготвен да го развие тој транспортен коридор со проширување на капацитетот.
„Веруваме дека оваа логистичка рута ќе игра важна улога во билатералната трговија и по војната“, рече Свириденко.
Главната рута за извоз на жито во Украина е преку нејзините црноморски пристаништа, но Киев бара алтернативни патишта по одлуката на Москва во средината на јули да се повлече од договорот за жито, кој предвидуваше извоз на украински жито преку Црното Море.
Министерот за надворешни работи Дмитро Кулеба за време на неговата посета на Загреб на крајот на јули изјави дека Украина и Хрватска се договориле за можноста за користење на хрватските пристаништа на Дунав и Јадранското Море за извоз на украинско жито.
Подготвено од А.Ѓ.
About Author
