15.09.2023 Скопје
Унгарскиот министер за надворешни работи Петер Сијарто го обвини Стокхолм дека дава „нефер и неточни“ забелешки за состојбата на демократијата во Унгарија, кои според него се „спротивни“ на барањето на Шведска за влез во НАТО, кое Будимпешта се уште не го ратификувала.
„Ги поканувате нашите парламентарци да го ратификуваат вашиот прием во НАТО, додека продолжувате да ги обвинувате за уништување на демократијата во Унгарија“, напиша Сијарто во писмото до неговиот шведски колега Тобијас Билстром објавено на платформата Х (Твитер).
Сијарто реагираше на десетминутното видео објавено од УР, шведскиот јавен радиодифузер за образование, во кое се критикува состојбата на демократијата во Унгарија.
„Оваа противречност сега стана уште посилна и дефинитивно не помага да се исполни вашето континуирано барање“, предупреди унгарскиот министер.
Ѓерѓељ Гуљаш, пратеник на владејачката партија, истакна дека доколку филмот се прикажува во државните училишта, „тоа значи дека Шведска прави се за да ја спречи Унгарија да го ратификува пристапот во НАТО“.
Унгарија, која беше една од последните земји што го потпиша приемот на Финска во НАТО, со месеци го одложи одобрувањето на кандидатурата на Шведска за приклучување кон воениот блок бидејќи тврди дека Стокхолм ги критикувал демократските вредности на земјата.
„Шокантно едукативно видео одобрено од шведската влада за нападот врз Унгарија! Како да ги убедите унгарските пратеници да го поддржат членството на Шведска во НАТО кога нашата демократија постојано се доведува во прашање, навредувајќи ги нашите гласачи“, објави главниот политички офицер на премиерот на социјалните мрежи, советникот Балаж Орбан.
Откако Турција се согласи да ја поддржи кандидатурата на Шведска на самитот во Вилнус во јули, генералниот секретар на НАТО Јенс Столтенберг рече дека добил гаранции од унгарскиот премиер Виктор Орбан дека неговата земја нема да продолжи да се противи на членството на Стокхолм.
Три дена по самитот во Вилнус, пратеникот на Фидес и шеф на Комитетот за надворешни работи на унгарското национално собрание, Золт Немет, претпазливо сигнализираше дека парламентот можеби е подготвен да „почне со работа“ за ратификација на шведската кандидатура „во средината на септември“. Европската унија со години ја прозива Унгарија поради падот на нивото на демократија во земјата.
Минатиот септември, во извештајот на Европскиот парламент се вели дека земјата станала „изборна автократија“, додека Европската комисија е во повеќегодишна битка со националистичката партија Фидес околу наводната злоупотреба на јавните средства за збогатување на личности блиски до владејачката партија.
Сијарто денеска на Фејсбук објави и дека пратениците во унгарскиот парламент добиле мандати во демократска конкуренција и дека оттогаш континуирано работат на подобрување на животниот стандард во нивните изборни единици, како резултат на што, како што додаде, многу од нив имаат четири, пет и слично и шест пати избрани од народот.
Подготвено од А.Ѓ.
About Author
