26.09.2023 Скопје
Во Националната галерија на Северна Македонија – објект Чифте амам – на 28 септември (четврток) во 20 часот ќе биде отворена ретроспективно-јубилејната изложба на Миле Корубин (1922 – 2000).
Поттик за организирање омаж посветен на Миле Корубин, еминентен македонски сликар, е одбележувањето на 100-годишнината од неговото раѓање. Овие јубилеи се основни поводи преку кои Националната галерија, како институција која седум и пол децении се грижи за чувањето и заштитата на дел од движното културно наследство од историјата на уметноста на нашата земја, континуирано ги презентира врвните национални културни достигнувања. На оваа примарна визија, мисија и функција се надоврзуваат и заложбите за потсетување за особените специфики на значајните легати од творештвото на големите уметници од македонското модерно сликарство и скулпторство, преку селекција и претставување дела кои се наоѓаат во повеќе државни и јавни институции од земјава, како и во приватни колекции.
Кураторки на изложбата се Маја Неделкоска Брзанова, виш кустос, и Маја Чанкуловска Михајловска, виш кустос. Изложбата ќе биде достапна за публиката до 27 октомври 2023 година.
Подготвено од А.Ѓ.
About Author
