07.08.2023 Скопје
Министерството за администрација на локалната самоуправа на привремените институции на Приштина го заврши изготвувањето на административните упатства за петицијата за разрешување на претседателите на четири општини на северот на Република Косово.
Според тој документ, целата процедура би можела да трае подолго од три месеци.
Најмалку тројца граѓани со право на глас во одредена општина треба да покренат петиција за разрешување на градоначалникот на таа општина.
Пред да почнат со собирањето потписи, за иницијативата треба да го известат претседателот на општинското собрание, кој за тоа го информира ресорното министерство и Централната изборна комисија.
Претседателот на собранието на општината има рок од пет дена да го разгледа барањето за претставка и да ја регистрира иницијаторската група како овластено лице, а доколку тоа не го стори во овој рок, групата иницијатор на петиција може да се обрати до ЦИК и да побара регистрација.
Најдоцна пет дена по пријавувањето, претседателот на општинското собрание мора да побара од ЦИК ажуриран список на избирачи и да ја достави потребната документација до иницијативната група за петицијата.
Групата за петиција има рок од 30 дена од приемот на документацијата да го собере потребниот број потписи и овој рок може да се продолжи за дополнителни 15 дена.
Собраните потписи се доставуваат до претседателот на општинското собрание и до ЦИК, која ја верификува листата на потписи.
Доколку петицијата ја поддржат најмалку 20 отсто од избирачите, ЦИК организира гласање за смена на градоначалникот, според процедурата согласно законите за општи и локални избори.
Гласањето за разрешување на градоначалникот во тој случај се организира најдоцна во рок од 45 дена, а за да бидат сменети треба да гласаат 50 плус еден процент од запишаните избирачи во општината.
Доколку потребниот број гласачи не го поддржат разрешувањето, не може да се покрене нова иницијатива за смена на градоначалникот пред истекот на 12-месечниот период.
Ељберт Красниќи, министер за локална самоуправа на приштинските привремени установи, истакна дека целта на упатството е да се утврди постапката за покренување, организирање и поднесување граѓанска иницијатива за разрешување на претседателот на општината, во согласност со Законот за локална самоуправа.
„Домашните и меѓународните институции беа дел од дискусиите, работните и стручните консултации, како и работните групи. Во однос на тоа прашање, со оглед на тоа што првпат се занимава нормативната регулатива, имаше многу коментари и предлози“, изјави Красниќи.
Подготвено од А.Ѓ.
About Author
