12.09.2023 Скопје
Официјалната новинска агенција на Северна Кореја, потврди дека лидерот Ким Џонг-ун е пристигнат во Русија и ќе се сретне со рускиот претседател.
Вчера слична потврда дојде и од портпаролот на Кремљ, Дмитриј Песков, кој сепак не даде детали за распоредот на посетата на севернокорејскиот лидер.
Јужнокорејската влада вчера извести дека специјален оклопен воз тргнал од Пјонгјанг за Владивосток и ќе пристигне на својата дестинација утрово. Ова е прво патување на Ким во странство по четири години.
Според јужнокорејското Министерство за одбрана, фотографиите објавени од официјалните медиуми на Пјонгјанг сугерираат дека Ким е придружуван од највисоките претставници на севернокорејската одбранбена и вооружена индустрија.
Белата куќа, минатата недела, врз основа на разузнавачки информации, соопшти дека Русија би можела да преговара за купување артилериски гранати од Пјонгјанг.
Подготвено од М.Н.
About Author
