15.09.2023 Скопје
По катастрофалните поплави кои го зафатија источниот дел на Либија, особено градот Дерна, кој беше срамнет со земја, на оваа земја и се закануваат инфекции.
Градоначалникот на Дерна изјави дека се стравува дека до 20.000 луѓе загинале во поплавите по пукањето на браните во овој либиски град.
Катастрофални поплави во неделата го погодија истокот на земјата.
Според градоначалникот на Дерна, се проценува дека од 18.000 до 20.000 луѓе загинале кога пукнале две брани, по што дошло до цунами, додека луѓето спиеле.
Тој вели дека проценките се базираат на бројот на населени места уништени од поплавата.
Неоткриените тела се уште се под урнатините или во морето, што го зголемува ризикот од болести.
Вработените во Итната помош во Либија се тркаат со времето за да ги закопаат оние што загинаа во поплавите во градот Дерна – за да се спречи ширењето на болеста, соопштија либиските служби за итни случаи.
Спасувачките тимови успеале да навлезат во неколку оддалечени области во Дерна и Сус, но дека има делови кои се уште се тешко достапни. Се земаат примероци од телата за ДНК анализа за идентификација.
Обединетите нации предупредија дека десетици илјади луѓе раселени во Либија сега се изложени на ризик од болести кои ги носи загадената вода.
Јенс Лерке, заменик-портпарол на Канцеларијата на ОН за координација на хуманитарни прашања, изјави дека бунарите се контаминирани и дека може да има втор бран на болеста доколку итно не се решат.
Плажата во Дерна е покриена со работи од поранешни апартмани: парчиња облека, делови од мебел и детски играчки.
Во Дерна, град со околу 100.000 жители, две брани пукнаа како последица на обилните дождови кои ги донесе бурата „Даниел“, која предизвика поплава на вода како цунами да помине низ градот.
Цели семејства исчезнаа во напливот на вода, цели населби беа избришани од лицето на Земјата, а десетици илјади луѓе беа раселени.
Експертите уште од 2011 година предупредуваат дека постои можност браните да пукнат, но никој не презел ништо во врска со тоа.
Портпаролот на службите за итни случаи изјави дека тие признаваат дека има пропусти, „иако ова е првпат да се справуваат со катастрофа од ваков размер“.
Лидерите на либиската администрација со седиште во Триполи го повикаа обвинителството на земјата да отвори истрага за уривањето на двете брани што доведоа до катастрофални поплави во градот Дерна.
Либија богата со нафта е растргната од политички судири, корупција и „надворешно“ мешање од бунтот во 2011 година во кој беше соборен и убиен Моамер ел Гадафи.
Децениските напори за формирање единствена функционална влада не успеаја, и наместо тоа, две ривалски влади, секоја со свои милиции, имаат две места: едната во Триполи на запад, другата во Тобрук на исток.
Подготвено од А.Ѓ.
About Author
