07.09.2023 Скопје
На последниот ден од самитот на Асоцијацијата на државите од Југоисточна Азија (АСЕАН) во Џакарта, генералниот секретар на ОН, Антонио Гутереш, предупреди на опасноста од фрагментација и „голем прекин“ на светските економски и финансиски системи.
Во говорот на самитот на АСЕАН, на кој присуствуваа САД, Кина, Јапонија и други земји, Гутереш ги повика светските лидери да најдат мирни и инклузивни решенија за предизвиците со кои се соочува светот.
„Постои реална опасност од фрагментација – голем дефект на светските економски и финансиски системи, со различни стратегии во технологиите и вештачката интелигенција и конфликтни безбедносни рамки“, рече генералниот секретар на ОН.
Гутереш повика на воспоставување механизам за давање помош на задолжените економии во развој, суспензија на плаќањата (долгови), подолги рокови на заемот и пониски каматни стапки. Тој, исто така, го поддржа пренасочувањето на дополнителни 100 милијарди долари од специјалната програма за повлекување на Меѓународниот монетарен фонд преку мултилатералните развојни банки за да се зголеми ликвидноста и да се задоволат потребите на земјите во развој.
Гутереш, исто така, рече дека останува „длабоко загрижен“ за влошувањето на ситуацијата во Мјанмар, каде воен удар е на сила од 2021 година, кога станува збор за политичките, човековите и хуманитарните права.
„Го повторувам мојот итен повик до воените власти во Мјанмар да ги слушаат аспирациите на својот народ, да ги ослободат сите политички затвореници и да ја отворат вратата за враќање на демократското владеење“, рече тој.
Истовремено, на форумот во Источна Азија, како дел од самитот на АСЕАН, индонезискиот претседател Џоко Видодо ги повика лидерите кои учествуваат на форумот да ги отстранат тензиите и да не создаваат нови конфликти или војни.
Индонезија, која претседава со АСЕАН оваа година, исто така повика на форумот да биде место за соработка наместо заострување на меѓудржавните ривалства.
Се очекува светските лидери да одржат серија состаноци за безбедност и трговија денеска, на последниот ден од самитот на АСЕАН, бидејќи некои области се соочуваат со тензии и отворени конфликти.
Покрај земјите-членки на АСЕАН, на самитот учествуваат и потпретседателот на САД Камала Харис, кинескиот премиер Ли Џианг и рускиот министер за надворешни работи Сергеј Лавров, како и лидерите на партнерските земји – Јапонија, Јужна Кореја, Индија, Австралија и други.
Подготвено од А.Ѓ.
About Author
