27.09.2023Скопје
Германската армија се најде во проблем откако се покажа дека новата опрема, која е платена 1,3 милијарди евра, не работи.
Минатата година германската влада започна огромна кампања за превооружување, во која ќе потроши 100 милијарди евра, обезбедувајќи пари за армијата во време кога земјата се соочува со деиндустријализација и економска стагнација.
Борис Писториус, германскиот министер за одбрана, ќе има многу објаснувања, бидејќи се појавија извештаи од Бундесверот дека новата серија дигитални радио комуникациски системи во вредност од 1,3 милијарди евра за возила со следење и тркала ќе седат во складиште со години поради тешкотиите во инсталацијата.
Приближно 34.000 армиски возила треба да бидат опремени со дигитални радија. Станува збор за милијарди евра. Испораките на овие радија траат од јануари. Сега излезе дека уредите ќе биде тешко или невозможно да се инсталираат.
Дигиталните радија, произведени од компанијата „Rohde&Schwarz“, треба да ги заменат постарите, аналогни уреди на Бундесверот.
Новата опрема е исклучително тешко да се монтира на различни типови воени возила, бидејќи тие бараат адаптери.
Откриени се и други проблеми, како што се батериите со мал капацитет. Се наведува дека се потребни корекции за повеќе од сто различни видови возила.
Овие проблеми го принудија Министерството за одбрана да ја чува ново набавената опрема во магацини.
„Тоа ќе трае со години. Ние трошиме милијарди евра на радио опрема, која нема да се користи долго време“, рече Андреас Шварц, пратеник на Социјалдемократската партија.
Кампањата на Бундесверот наречена „Дигитализација на копнените операции“ се очекува да ја чини Германија околу пет милијарди евра.
Минатата година Берлин најави амбициозно зголемување на трошоците за одбрана од 100 милијарди евра, во услови на драматична ескалација на тензиите меѓу НАТО и Русија поради војната во Украина.
Досега германската влада издвои околу 30 милијарди евра кои се уште не им ги исплати на производителите, задржувајќи ги средствата додека оружјето и опремата не и бидат доставени на армијата.
Бундесверот ја опремува првата од трите планирани борбено подготвени дивизии до 2025 година, но проблемите веќе се појавуваат поради големиот одлив на воена опрема и муниција за војната во Украина.
Меѓу членките на НАТО, Германија троши најмногу за Украина. Досега има издвоено повеќе од 17,1 милијарди евра за воена опрема, што е многу повеќе од која било друга земја, со исклучок на Соединетите Американски Држави.
Подготвено од А.Ѓ.
About Author
