26.09.2023 Скопје
За време на „специјалната операција“ доверена на крајбрежната стража, Филипините отстранија пловечка бариера подигната од Кина во рибарска зона во близина на Атолот Скарборо, спорна област во Јужното Кинеско Море.
„Бариерата претставуваше опасност за пловидбата, со отворено кршење на меѓународното право. Тоа, исто така, го попречи спроведувањето на риболовните активности, а со тоа и егзистенцијата на филипинските рибари“, се вели во белешката објавена од владата на Манила, која го дефинира спорниот атол како „интегрален дел од националната територија на Филипините“.
Манила веќе изрази огорченост, како одговор на сликите од поставувањето на пловечката бариера од страна на кинеската крајбрежна стража составена од долга серија меѓусебно поврзани пловци.
Советникот за национална безбедност на Манила, Едуардо Ано, вчера веќе предвиде дека филипинските власти се подготвени да ги преземат „сите неопходни мерки“ да се отстрани бариерата.
Сликите објавени на социјалните мрежи за време на викендот покажаа неколку пловци наредени и чувани од кинески чамци во областа, позната на Филипините како Bajo de Masinloc.
Бариерата била долга околу 300 метри и била откриена на 22 септември за време на „рутинска поморска патрола“, изјави портпаролот на филипинската влада Џеј Тариела.
Кога филипинските чамци се занимаваа со риболовни активности во областа, четири брода на кинеската крајбрежна стража ги испратија со радио 15 пати „во обид да ги избркаат“, додаде Тариела.
Вчера кинеското Министерство за надворешни работи не даде директни коментари во врска со пловечката бариера, туку ги бранеше акциите на кинеската гарда во Пекинг, повикувајќи се на „неопходните мерки“ усвоени како одговор на „упадите“ на филипинските чамци што се случија минатиот петок. Областите за кои тврди Кина изнесуваат 90 отсто од површината на Јужното Кинеско Море и се преклопуваат со Ексклузивните економски зони на Виетнам, Малезија, Брунеи, Индонезија и Филипините.
Подготвено од А.Ѓ.
About Author
