06.09.2023 Скопје
Европската унија бара од Босна и Херцеговина да воведе визи за земјите со кои има безвизен режим, а кои се под визниот режим на ЕУ.
Меѓу земјите за кои ЕУ сака БиХ да воведе визи се Азербејџан, Бахреин, Кина, Кувајт, Оман, Катар, Русија и Турција. Иако ова барање сигурно ќе предизвика огорченост во БиХ, барем кога станува збор за некои земји од списокот, тоа е обврска што произлегува од Договорот за безвизен режим меѓу БиХ и ЕУ од 2010 година. Имено, една од клучните обврски на БиХ е постепено да ја усогласува својата визна политика со визната политика на ЕУ доколку сака да го задржи безвизниот режим. Оттогаш поминаа 13 години, а Босна и Херцеговина сè уште не ја исполни оваа обврска, што може да го загрози нејзиниот безвизен статус.
Ненад Нешиќ, министер за безбедност на Босна и Херцеговина, потврди дека ова е прашање поставено од соговорници од ЕУ. Последен пат за тоа има разговарано за време на минатонеделната посета на Виена, каде што има разговарано со Герхард Карнер, министерот за внатрешни работи на Австрија.
„Тие побараа од нас да воведеме визи, а јас им објаснив дека во моментов не е можно да се постигне внатрешен договор во однос на визите за граѓаните на Русија и за граѓаните на Турција, бидејќи имате Срби кои не би се согласиле со визи за Русија и Бошњаци кои не би се согласиле со воведување визи за Турција“, изјави Нешиќ. Сепак, тој посочи дека во овој момент постои можност за воведување визи за некоја од земјите на листата.
„Така би ја покажале нашата подготвеност за компромиси и на некој начин би ја покажале нашата припадност кон европското семејство“, истакна Нешиќ.
Европската комисија порачува дека Босна и Херцеговина мора да почне да напредува во однос на усогласувањето на визната политика со ЕУ. Во моментов, сепак, се чини дека приоритет е воведувањето визи за земјите кои претставуваат предизвици поврзани со нерегуларната миграција и безбедносните закани.
„Тоа ќе биде важна тема на континуираниот дијалог меѓу ЕУ и БиХ. Во контекст на механизмот за суспензија, во согласност со член 8 од Регулативата за визи, Европската комисија постојано ќе ги набљудува и оценува активностите што БиХ ги презема да ги усогласи со визната политика на ЕУ“, велат тие.
Со други зборови, Европската комисија го задржува правото да им препорача евентуално суспендирање на безвизниот режим на министрите за внатрешни работи на ЕУ доколку БиХ не ја почитува визната политика на ЕУ.
Освен за прашањето за визната политика, ЕУ е најзаинтересирана за управување со миграцијата, особено кога станува збор за хуманиот третман на барателите на азил и бегалците, како и за правилно функционирање на системот за барање азил.
„Сè уште има сериозни пречки за да се обезбеди ефективен пристап до процедурите за азил. Законите треба подобро да се имплементираат, особено за да се обезбеди системско почитување на процедуралните гаранции за барателите на азил. Пристапот до азил треба да се зајакне за побрзо да се обработуваат пристигнатите барања“, нагласија од ЕУ.
Подготвено од А.Ѓ.
About Author
