13.09.2023 Скопје
Новото истражување покажа дека црвената огнена мравка, еден од најинвазивните видови во светот, за првпат е пронајдена во Европа.
Увезената мравка, чие научно име е Solenopsis invicta, е родена во Јужна Америка, но во текот на минатиот век се проширила во поголемиот дел од САД, Мексико, Карибите, Кина и Австралија.
Овие инсекти можат да бидат агресивни кога се вознемирени и да имаат болен убод, што ја иритира кожата и може да предизвика алергиски реакции. Оваа мравка исто така може да предизвика штета на посевите и локалните екосистеми. Истражувачите рекоа дека идентификувале 88 гнезда на црвени огнени мравки распослани на пет хектари во близина на градот Сиракуза во Сицилија, Италија.
„Solenopsis invicta е еден од најлошите инвазивни видови. Може да се шири алармантно брзо“, вели главниот автор на студијата Матија Менчети, истражувач на Институтот за еволутивна биологија во Шпанија.
„Наоѓањето на овој вид во Италија беше големо изненадување, но знаевме дека ќе дојде овој ден“, рече Менчети.
Иако црвените мравки се откриени во увезените производи во Шпанија, Финска и Холандија, колонијата никогаш не била потврдена пред оваа студија.
Во предградијата на Сиракуза беа пронајдени колонии. Не беше јасно како и кога огнените мравки стигнале таму. Истражувачите зад студијата веруваат дека инсектите мора да пристигнале на транзитна точка со многу човечка активност, како што е градското пристаниште.
Локалните жители им рекоа на научниците дека убодите од мравки се зголемени од 2019 година.
Студијата покажа дека ветрот би можел да ги пренесе летечките кралици мравки од северозападна Сиракуза, каде што се наоѓа комерцијалното пристаниште. Генетската анализа на мравките откри дека тие најверојатно се шират од САД или Кина, каде Solenopsis invicta е исто така инвазивен вид.
Истражувачите предупредуваат дека мравките наскоро би можеле да се шират низ Европа, бидејќи седум проценти од континентот – вклучувајќи ги големите урбани области како што се Барселона, Рим, Лондон и Париз – има клима погодна за овој вид, според моделот развиен од авторите на студијата.
Во извештајот поддржан од Обединетите нации објавен минатата недела се наведува дека инвазивните видови го чинат светот најмалку 423 милијарди долари секоја година бидејќи предизвикуваат истребување на растенија и животни, ја загрозуваат безбедноста на храната и ги влошуваат еколошките катастрофи ширум светот.
Подготвено од А.Ѓ.
About Author
