28.09.2023 Скопје
Грција ја зафати ново невреме, а денеска најтешка е состојбата во областа на градот Волос и островот Евија, каде патиштата се блокирани, а најголемиот дел од населението е оставено без струја.
Обилните врнежи донесени вчера од бурата Елиас го погодија северниот дел на Евија, грчки остров кој беше сериозно загрозен од шумски пожари во 2021 година, како и регионот на Тесалија што беше погоден од бурата Даниел претходно овој месец.
Голем дел од градот Волос повторно е под вода и кал, пожарникарите и војската ги евакуираа луѓето од куќите и автомобилите, а жителите повторно се без струја.
Утрово во шест часот во Волос повторно почна да врне дожд што претходниот ден предизвика порои и поплави во централниот дел на Грција.
Според претставници на противпожарната служба, во неколку делови на Волос водата достигнува висина од 50 сантиметри.
Патиштата во оваа област се покриени со тони камења и кал, а областа е непрепознатлива. Дел од населението мораше да ги напушти домовите, а многу возила беа однесени од поплавата.
This is happening in Volos right now #βολος #πλημμυρες #Μπεος pic.twitter.com/87IwhqejYj
— Shadab Javed (@JShadab1) September 27, 2023
Припадниците на грчката армија ги ослободиле патниците кои девет часа биле заглавени во нивните возила и чекале помош.
Водата рано утринава се повлекла на повеќе места, па многу патишта се отворени, но многу се уште непристапни.
Поради ситуацијата која настана во Волос по новото невреме, градоначалникот Ахил Беос рано изутрината излезе да ја провери состојбата на улиците.
„Тажен сум, немам сила да зборувам, тоа е ситуација која не можам да ви ја опишам“, изјави градоначалникот.
📍 Flooding in Milina Pelion, Greece
Another Area Affected by Storm Elias. #Βολος #Volos #Greece #flooding #Climatecrisis #stormelias #Κακοκαιρια_Elias #ΚακοκαιριαElias
— Unframed Soulset (@unframedai) September 27, 2023
Опишувајќи го она што го доживеа Волос во средата навечер, тој рече дека „животите се во опасност“.
Кога станува збор за снабдувањето со електрична енергија, тој рече дека 70 до 80 отсто од Волос немаат струја, додека проблем има и со водоснабдувањето.
Во локалниот Оперативен центар на Противпожарната единица од вчера до денеска во 7 часот утрово се примени вкупно 1.200 повици.
Тешка е ситуацијата и во Евија, каде утрово е одлучено, по налог на градоначалникот, да се забрани сообраќај на поширокото подрачје на Асмини, Пефки, Артемисио и Гувес, поради развој на опасни временски услови.
Последните неколку часа беше многу тешко во Истија и околината, каде што пожарникарите мораа да интервенираат во спасувачка акција за ослободување на мајка и мало дете во Асмини кои беа опколени со вода.
Тие стигнуваат и до други села во централна и северна Евија со брод.
Движењето на противпожарната бригада од центарот на Халкида кон северна Евија не е возможно, бидејќи патиштата се непроодни, а градежните машини работеа цела ноќ за да минат спасувачките екипи.
Според метеоролозите, грчките региони кои денеска може да очекуваат обилни дождови и силно невреме ги вклучуваат префектурата Атика и градот Атина, а локално обилни дождови и невреме се очекуваат до пладне во околината на Волос, на Споради и Евија, во областите Фтиотиди, Фокид и Беотија.
Подготвено од А.Ѓ.
About Author
