24.08.2023 Скопје
Северна Кореја утрово го направи вториот обид да постави воен извидувачки сателит во Земјината орбита, но лансирањето не успеа, како и она што беше извршено на 31 мај.
Оваа информација ја објавија корејските државни медиуми, додавајќи дека земјата ќе направи трет обид во октомври.
Според медиумите, лансирањето на новиот тип на ракета-носач Chollima-1 што го носи сателитот Malligyong-1 во обид во раните утрински часови да се лансира, не успеа поради грешка во системот за раздвојување во итни случаи при летот на третата фаза на проектилот.
Лансирањето, кое веќе беше предвидено во последните денови од јапонската влада, доаѓа во врска со големата заедничка воена вежба преземена оваа недела од вооружените сили на САД и Јужна Кореја.
Јапонскиот премиер Фумио Кишида на прес-конференција утринава изјави дека лансирањето на ракетата-носач, иако не успеа, е уште еден пример за употреба на балистички технологии од страна на Северот што ги прекршува резолуциите на Советот за безбедност на ОН.
Главниот секретар на кабинетот и портпарол на јапонската влада, Хироказу Мацуно, за време на вонредната прес-конференција изјави дека лансирањето на севернокорејската ракета се случило утринава во 3:51 часот од локацијата Тонгчанг-ри, и дека пред да потоне во Пацификот, проектилот прелетал над јужната јапонска префектура Окинава.
Мацуно го обвини Пјонгјанг дека „сериозно ја загрозил“ регионалната безбедност со лансирањето на ракетата и додаде дека Токио веќе пренел формален протест преку својата амбасада во Пекинг.
Подготвено од М.Н.
About Author
