01.08.2023 Скопје
Унгарскиот парламент не гласаше за прием на Шведска во НАТО на вонредната седница, свикана на иницијатива на опозицијата.
Пратениците на владејачката партија „ФИДЕС – Унгарски граѓански сојуз“ и нивните партнери ја бојкотираа седницата, поради што немаше кворум.
Како што се наведува, немало доволно гласови за усвојување на дневниот ред, во кој пратениците од опозицијата предложиле да се вклучи и прашањето за влез на Шведска во Северноатлантскиот договор. Состанокот, објавен на веб-страницата на парламентот, се сведе на размена на мислења меѓу претставници на опозициските партии за повеќе прашања од внатрешната и надворешната политика.
Унгарскиот парламент ја заврши пролетната седница на 7 јули, но претседателот Ласло Кевер беше принуден да свика вонредна седница бидејќи 49 пратеници од опозицијата излегоа со таква иницијатива. За ова, според законот, беа доволни 40 пратеници. Во исто време, ФИДЕС, која заедно со демохристијаните има 135 од 199 места, објави дека има намера да размислува за влез на Шведска во НАТО дури наесен.
Да потсетиме дека Унгарија е сè уште единствената земја, заедно со Турција, која ги нема ратификувано документите за пристапување на Шведска во Алијансата.
Будимпешта, претходно, го изрази своето незадоволство од непријателските изјави на шведските политичари и на оваа тема разговараше со Стокхолм.
Министерот за надворешни работи на Унгарија, Петер Сијарто, претходно изјави дека Будимпешта постојано се консултира со Турција во врска со ратификацијата на членството на Шведска во НАТО и дека нема да го забави влезот на земјата во Алијансата доколку има напредок во преговорите меѓу Анкара и Стокхолм.
Унгарија во неколку наврати изјави дека нема намера да ја спречи Шведска да влезе во НАТО и дека „нема да биде последна што нема да ратификува таков договор“.
Владата минатото лето ги достави документите за прием на Финска и Шведска во НАТО на ратификација во парламентот.
На 27 март, унгарските пратеници го одобрија пристапот на Финска во алијансата, но го одложија разгледувањето на шведското прашање. Финска и Шведска ги поднесоа апликациите на 18 мај 2022 година, со оценка на нејзините политичари дека настаните во Украина ги поттикнале на овој чекор.
Подготвено од А.Ѓ.
About Author
