15.08.2023 Скопје
Соединетите Американски Држави најавија нов пакет воена помош за Украина во вредност од 200 милиони долари.
Пакетот вклучува муниција за противвоздушна одбрана, артилериски гранати и дополнителна опрема за деминирање, соопшти Стејт департментот.
Секојдневно Русија ја уништува цивилната инфраструктура на Украина, а исто така го вооружува гладот и придонесува за глобалната несигурност на храна преку уништување на цивилните пристаништа и инфраструктурата за жито во Украина.
Соединетите Американски Држави и нивните сојузници, ќе стојат покрај Украина онолку долго колку што е потребно, стои во соопштението од Стејт департментот.
Украинскиот претседател Володимир Зеленски испрати порака со благодарност до САД и претседателот Џо Бајден, американскиот Конгрес и американскиот народ за новиот пакет воена помош од 200 милиони долари.
„Ракетите за противвоздушна одбрана, артилериската муниција, системите за деминирање и противтенковското оружје ќе го зголемат капацитетот на нашите одбранбени сили“, напиша Зеленски на X (поранешен Твитер).
Според Зеленски, новата помош од Вашингтон е „уште еден чекор кон заедничка победа“.
Подготвено од М.Н.
About Author
