23.08.2023 Скопје
Претседателите на Азербејџан и Узбекистан, односно Илхам Алиев и Шавкат Мирзијоев во Баку потпишаа 15 договори за соработка, формирајќи го новиот Врховен меѓудржавен совет и усвоија Агенда за продлабочување на стратешкото партнерство во период 2023-2024 година, соопшти прес-службата на узбекистанското претседателство.
Договорите потпишани од двајцата лидери особено се однесуваат на зајакнувањето на соработката меѓу владите и државните агенции во секторите енергетика, транспорт, младински политики и спорт.
Ревидиран е договорот за ослободување од визниот режим за граѓаните на двете земји, воведен е систем на размена на информации за доделување дозволи за престој и работа, воспоставени се нови форми на соработка во областа на безбедноста (вклучувајќи и компјутерски науки).
На вчерашната средба, двајцата претседатели, придружувани од нивните делегации, разговараа за развојот на билатералните односи, особено во трговската, индустриската соработка и логистичката инфраструктура.
Се разговараше за главните заеднички проекти од областа на автомобилската индустрија, металургијата, енергетиката, земјоделството, електронското инженерство, текстилната индустрија и туризмот.
Договорената цел е билатералната трговска размена да се зголеми на една милијарда долари во следните години, а во таа насока се создадени Инвестициски фонд на Азербејџан и Узбекистан и Азербејџанско-узбекско инвестициско друштво.
Мирзијоев и Алиев, исто така, истакнаа дека се задоволни од резултатите на бизнис форумот што се одржа во Баку на 21 август, ден пред доаѓањето на претседателот на Узбекистан и ја истакнаа потребата од унапредување на соработката во транспортниот сектор.
Во таа насока, постигнат е договор за реализација на проекти насочени кон зголемување на обемот на стоки транспортирани долж транскасписката рута преку развој на нови логистички синџири и изградба на инфраструктура.
Се разговараше и за создавање на заедничка логистичка компанија во рамките на Транскасписката меѓународна транспортна рута (ТИТР), или Среден коридор, како и изградбата на депоа и логистички центри во пристаништето Баку и во трети земји.
Двајцата лидери потсетија како минатата година двојно се зголемил бројот на узбекистански стоки транспортирани преку пристаништето на главниот град на Азербејџан.
На крајот, информираат од претседателството на Ташкент, двајцата претседатели посветиле посебно внимание на развојот на културните односи, во овој контекст, оваа година во Узбекистан ќе се организира првиот форум посветен на младите од двете земји.
Подготвено од М.Н.
About Author
