08.08.2023 Скопје
Грчкиот министер за внатрешни работи Јанис Иконому веднаш суспендираше седум високи полициски службеници.
Почна и внатрешна истрага поради доцнењето на полициската интервенција, како и кривична истрага на Врховниот суд против сите инволвирани.
И покрај забраната на Европската фудбалска унија (УЕФА) за пристигнување на навивачи, од 100 до 120 навивачи на Динамо Загреб се појавија доцна во понеделникот во близина на стадионот на АЕК, соопшти грчката полиција.
Судирите избија повеќе од еден час откако заврши тренингот на гостинската екипа и тимот го напушти стадионот, а навивачите од двете страни фрлаа ракети, рачно изработени експлозиви и камења.
Нејасно е како толку голема група навивачи успеала да стигне до Атина, без автомобилите никаде да бидат запрени од полициски сили кои знаеле за забраната за организирано движење на навивачите кои патуваат со клубски знамиња.
Се чини дека биле поделени во помали групи и дека некои патувале преку Албанија, а некои со воз.
Полициските сили за интервенција на МАТ веќе беа мобилизирани, но пристигнаа по ерупцијата на насилство во која еден навивач на АЕК беше избоден со нож и набргу потоа им подлегна на повредите.
Полицијата соопшти дека мажот бил погоден со остар предмет во градите и починал од неконтролирано крварење од аксиларна вена.
Исто така, полицијата соопшти дека во врска со инцидентите се приведени 98, од кои 84 се хрватски државјани, еден Австриец, еден државјанин на БиХ, еден Албанец, еден Германец и двајца Грци.
На состанокот за безбедносните мерки закажан за вторник наутро, АЕК соопшти дека за тоа што се случило во текот на ноќта одговараат на Динамо Загреб и грчката полиција. Претставниците на клубот го напуштија состанокот со оглед на тоа што, како што изјавија, било „непријатно да се учествува“.
Натпреварот од третото квалификациско коло за Лигата на шампионите меѓу АЕК и Динамо требаше да се одигра вчера во 20:45 часот, но натпреварот беше одложен.
Подготвено од А.Ѓ.
About Author
